Teir bestu liggja nú borð um borð

Fyri einari viku síðani var fyrsti FM kappróðurin á norðoyastevnu. Tá vóru fínastu róðrarlíkindi, og soleiðis verður tað eisini í dag, tá ið annar FM kappróðurin verður. Hann verður í Kollafirði, har tey í vikuskifitinum halda sundalagsstevnu.

61 bátsmanningar hava boðað frá luttøku. 17 av teimum luttaka í barnaróðrinum.

Sammett við á norðoyastevnu er tað soleiðis, at hesa ferð liggja bátarnir, sum stóðu seg best fyri einari viku síðani borð um borð. Harvið fer at bera betri til at peila av, hvussu kappingin tørnar út – um tað nú aftur í dag vera somu bátar, ið fara at kappast um sigurin og heiðursmerkini, sum síðsta leygardag vóru við í tí kappingini.

Fyrsta startskotið verður klokkan 13.30, tá ið genturnar í barnaróðrinum leggja til brots, og kappróðurin verður liðugur nakrar minuttir í hálvgum seks, tá ið 10-mannaførini roknast at fara um málið.