Tað gjørdist ein heilt góður dagur hjá føroyingaliðunum í triðbestu donsku fótbóltsdeildini.
Hørður H. Askham var við frá dystarbyrjan tá lið hansara, AB á útivølli móti toppliðnum, Aarhus Fremad megnaði javnleik 1-1.
Aarhus Fremad var á odda 1-0 í steðginum. Tá 80 minuttir vóru leiktir av dystinum javnaði Hørður til 1-1, ið gjørdist endaliga úrslitið.
AB er nummar seks í deildini við 13 stigum.
Daniel Johansen spældi allan dystin, og Heini F. Sørensen slapp á vøllin teir seinastu 10 minuttirnar tá Thisted á heimavølli vann 1-0 á FA 2000.
Mathias Myrthue skoraði sigursmálið tá 17 minuttir vóru leiktir av dystinum. Daniel legði upp til málið við góðum hornasparki.
Thisted er nummar sjey í deildini við 11 stigum.
