Tølini siga, at KÍ er ógvuliga væl fyri. Burtursæð frá 2-2 ímóti HB í Klaksvík hevur KÍ vunnið allar hinar dystirnar. Hósdagin var úrslitið 9-0 í Sørvági. Hetta var størsti KÍ sigur á útivølli í 50 ár. Í 1971 royndi ÍF seg fyrstu ferð í bestu deildini. Tá vann KÍ – sunnudagin 31. mai í 1971 – 9-0 í Fuglafirði. Síðani hevur KÍ ikki vunnið so stórt á útivølli fyrr enn hósdagin í Sørvági.
Tríggjar tær seinastu ferðirnar hevur KÍ vunnið 9 stig við málmuninum 18-0. Tá ið KÍ í fyrsta umfari var á Svangaskarði, fóru gestirnir norður við 4-0 sigri.
Hóast B68 er langt frá KÍ á stigatalvuni, so hava toftamenn tvær tær seinastu ferðirnar víst, at teir kunnu megna at vinna úrtøku ímóti favorittum. Tað tykist sum um, at tað var hentur lærdómur, tá ið B68 tapti 6-0 á heimavølli ímóti Víkingi. Síðani hava úrslitini verið 1-0 tap ímóti HB á Tórsvølli, har toftamenn vóru ógvuliga verjukendir, og so 2-2 á heimavølli ímóti Víkingi. Tá var B68 frammanfyri bæði 1-0 og 2-1.
Hjá B68 er miðvallarin Jann Ingi Petersen skaddur, og ímóti Víkingi var miðvallarin Bárður Ó. Jensen, sum annars hevur verið rættiliga drúgvur higartil í ár, ikki við.
Hjá KÍ er stór kapping um plássini. Í gjár var Børge Petersen á vøllinum allan dystin, og Deni Pavlovic og Jonn Johannesen vóru við í fyrra hálvleiki, tá ið næstbesta liði vann 2-1 á útivølli ímóti HB. Jaspar Van Der Heyden varð skiftur inn eftir steðgin. Merkisvert var tað, at bæði Jonn Johannesen og Børge Petersen sóu gula kortið í gjár.
B68 hevur ikki vunnið stig í Klaksvík síðani 8. august í 2014, tá ið úrslitið var 0-0. Einasti maður, sum var við ta ferðina, og sum aftur verður á listanum í dag, er Páll A. Klettskarð.