Bý- og bygdaráðini á Tvøroyri og í Hvalba arbeiða víðari við kommunusamanlegging.
Á Flaggdegnum hevur fundur verið millum bý- og bygdaráðini á Tvøroyri og í Hvalba á kommunuskrivstovuni í Hvalba. Á fundinum umrøddu limirnir, hvørji mál eru týdningarmikil fyri báðar kommunur at fáa greiðu á í sambandi við eina kommunusamanlegging. Harumframt varð eisini viðgjørt, hvussu farast skal fram, skal ein fólkaatkvøða avgreiðast áðrenn summarferiuna í ár.
Hetta skrivar Tvøroyrar kommuna á síni heimasíðu.
Borgarstjórarnir Janus Thomsen og Kristin Michelsen siga, at talan var um ein jaligan fund og at niðurstøðan á fundinum var, at arbeitt verður víðari við eini møguligari samanlegging av Hvalbiar kommunu og Tvøroyrar kommunu.
