Tottenham spælarar í hornatøkum

Tottenham vann í gjár seinasta dystin í 33. umfari í Premier League. Dysturin verður lýstur sum ein tann vánaligasti í umfarinum, har eitt klossut sjálvmál bleiv avgerandi í 1-0 sigrinum hjá Tottenham móti Everton.

Mest umstrídda hendingin í dystinum var, tá dómarin bríkslaði til hálvleiks. Tá kom liðskiparin og málverjin hjá Tottenham, Hugo Lloris, rennandi í øðini eftir liðfelagnum Heung-Min Son. Teir endaðu í hornatøkum, áðrenn liðfelagarnir komu í millum.

Orsøkin er, at Heung-Min Son ikki er nóg grammur at renna í verjustøðu, tá Richarlison hjá Everton kemur í góða støðu. Eftir dystin bleiv José Mourinho, venjari hjá Tottenham, spurdur um støðuna.

- Tað var flott at síggja. Hetta er helst ein avleiðing av nøkur møtum, sum vit hava havt. Eg havi verið kritiskur um, at vit ikki seta okkum nóg stór krøv. Eg veit ikki um teir skumpast, men tað er týdningarmikið, at liðið mennist og forlangar meiri av hvørjum øðrum, segði José Mourinho á tíðindafundi eftir dystin.

Hugo Lloris segði eftir dystin, at slíkar hendingar skal mann ikki tosa um úti millum almenningin, men nakað sum hópurin taklar innanhýsis. Eftir dystin hálsfevndu umtalaðu spælararnir og alt er gott aftur.