Føroysku U16-kvinnurnar og U18-kvinnurnar spældu tveir spennandi og gevandi landsdystir móti Íslandi í gjár. Ísland vann báðar dystirnar við tveimum málum, skrivar Hondbóltssambandið.
Føroysku U16-kvinnurnar taptu tepurt 25-23 fyri Íslandi, eftir at Ísland var á odda 17-13 í hálvleikinum. Eitt góðkent avrik av okkara gentum, sum spældu teirra fyrsta landsdyst. Tíverri riggaði stroymingin ikki og fyriliggur tískil eingin dystarfrágreiðing.
U18-kvinnurnar taptu eisini við tveimum málum. Úrslitið var 31-29 til Íslands, eftir hálvleiksstøðuna 17-17. Liðini fylgdust í fyrru helvt av fyrra hálvleiki, har leikferðin var høg og var serliga Maria Pálsdóttir Nólsoy eyðsýnd í føroyska álopinum. Um miðjan fyrra hálvleik brendu okkara heldur illa og gjørdu nakrar tekniskar villu og kom Ísland fram um 8-5. Okkara komu tó væl aftur og fóru til hálvleiks við støðuni 17-17.
Føroyska liðið hevði sína bestu løtu í byrjanini av seinna hálvleiki. Silja Arngrímsdóttir Müller stongdi føroyska málið fyrstu 10 minuttirnar og var Lukka Arge eyðsýnd í álopinum við fleiri góðum langskotum. Føroyar komu fram um 21-17 áðrenn Ísland náddi at svara aftur. Fleiri feilir um miðjan hálvleik loyvdi tó íslendingum innaftur í dystin og vóru tað tær sum vóru omaná seinastu 10 minuttirnar av dystinum við einum ella tveimum málum.
Liðini hittast aftur í dag kl. 15.00 og 17.30.
Málskjúttar hjá Føroyum:
Lukka Arge 10 (7)
Karin Egholm 5
Sára Sigrunardóttir Mikkelsen 4
Lea Mohr 3
Maria Pálsdóttir 3
Barbara Hammer 3
Inga Maria Joensen 1
Málverji:
Silja Arngrímssdóttir Müller 8 bjargingar