Tíðindastovan NTB veit í morgun at siga, at tvey fólk hava latið lív í einum russiskum álopi á býin, Kherson, har suðuri í Ukraina.
Tað upplýsir guvernørurin í regiónini, Oleksandr Prokudin, á Telegram. Sagt verður, at lopið varð á ein bygning í Kherson, sum hýsir bussum.
- Ein 55 ára gamal maður læt lív í álopinum, og seinni doyði eisini ein 43 ára gamal maður á sjúkrahúsi av løstum, hann fekk í álopinum, sigur hann.
Upplýsingarnir eru ikki váttaðir av óheftum keldum, men guvernørurin hevur lagt út myndir av staðnum, sum skal vera rakt í álopinum.
Sambært NTB lýsir Oleksandr Prokudin russiska álopið sum eina yvirgangsatsókn.
