Aftur í kvøld stóð føroyska U17-manslandsliðið í hondbólti fyri einum góðum avriki í European Open kappingini í Gøteborg.
Føroyar megnaðu í kvøld javnleik 27-27 móti Noregi, ið er ein sterk hondbóltstjóð.
Noreg var á odda við seks málum í seinna hálvleiki, men við góðum verjuspæli og einum góðum málmansavriki hjá Bjarna Jacobsen eydnaðist tað Føroyum at knógva eitt stig heim.
Jákup Egholm var aftur toppskjútti í kvøld, hesaferð við sjey málum. Jákup er toppskjútti í kappingini við 44 málum í seks dystum.
Í morgin klokkan átta spæla Føroyar móti Belgia.
Málskjúttar: Jákup Egholm 7, Rúnar Hammer 5, Magnus Árason 4, Fríði Holm í Innistovu 3, Haraldur Karlsson 2, Jógvan Andreas Lamhauge 2, Lýðar í Dímun 1, Jón Midjord 1, Filip Haldansen 1, Magnus Orri Rubek Carlsen 1.
