HSF skrivar:
- Fransmenn vístu sína styrki
Hóast vit í løtum sóu gott spæl bæði í álopi og verju, var einki at gera við sterku mótstøðuna.
Fyrstu fimm minuttirnar vóru Føroyar omaná. Við klókum álopsspæli og ágangandi verjuspæli vóru føroyar á odda 3-4, tá fimm minuttir vóru spældir. Tað sást skjótt at fransmenn høvdu eina øgiliga kroppsliga styrki og nógva ferð í álopsstøðu. Teir spældu seg skjótt og væl til møguleikar, meðan okkara skuldu brúka nógv orku í álopinum. Verjan hjá Fraklandi var góð, og hetta trýsti okkara til nógvar tekniskar villur, sum góvu skjót mótálop hinvegin.
Miðskeiðis í fyrra hálvleiki fingu okkara fatur í verjuni. Jákup Egholm og Magnus Árason vóru eyðsýndir við góðum verjuspæli, og við trimum skjótum málum var bert eitt mál á muni. Fyrst Magnus Árason tvær ferðir á rað, og síðan Lýðar í Dímun.
Seinastu løtuna í fyrra hálvleiki, drógu fransmenn aftur frá. Eftir steðgin hildu teir á har teir sleptu. Tað vóru langar løtur millum føroysku málini, og Frakland spældi seg skjótt til møguleikarnar, og vóru sera effektivir í skotstøðunum. Nógvu mistøkini hjá Føroyum góvu Fraklandi lætt spæl í endanum. Millum annað við fleiri skotum í tómt mál, tá okkara spældu 7 ímóti 6. Hóast føroyingarnir stríddust tað teir kundu, var munurin á liðunum ov stórur til at vit kundu gera nakað við Frakland. Úrslitið kundi verið frægari um mistøkini høvdu verið færri.
Pauli Rasmussen varð kosin besti leikarin hjá Føroyum í dag.
Næsti dystur verður í morgin, týsdagin 14. juli ímóti Týsklandi. Dysturin byrjar klokkan 17:30. Skrivar HSF.
Dystargongdin Frakland – Føroyar
10 min. 6-4
20 min. 11-10
30 min. 19-14
40 min. 25-17
50 min. 31-22
60 min. 38-23
Málskjúttar hjá Føroyum:
Jákup Egholm 5 (2)
Magnus Árason 4
Pauli Rasmussen 4
Rúnar Hammer 3
Fríði Holm í Innistovu 3
Erling Erlendsson 2
Lýðar í Dímun 1
Jón Eyðunsson Midjord 1
Málverjar:
Bjarni Gunnarson Jacobsen. 50 min. 3 bjargingar.
Ingi Johannesen. 10 min. 1 bjarging.
