Fyrr í ár tapti U21-landsliðið heili 7-1 á útivølli móti Norðurmakedónia. Tapið er eitt tað mest eyðmýkjandi í søguni hjá U21-landsliðnum. Lukkutíð fyri U21-landsliðið, so hava teir møguleika at vaska stórtapið av sær, tá Norðurmakedónia er gestur á Tórsvølli týsdagin klokkan 17.
- At tapa 7-1 er og verður ongantíð ein ynskistøða. EM-undandysturin í dag fer nokk ongantíð í gloymibókini, hóast eg vildi ynskt, at hann longu nú var gloymdur! Venjarin hevur høvuðsábyrgdina fyri gongdini, og hana viðurkenni eg til fulnar. Eg harmist spælaranna vegna, eisini vegna allar fótbóltsføroyar, men viðhvørt er veruleikin eirindaleysur! Vit kunnu velja at verða liggjandi ella reisa okkum. Eg velji seinnu loysnina, skrivaði Eli Hentze eftir dystin í Norðurmakedónia.
Síðani heimliga kappingin endaði síðst í oktober, hava Eli Hentze, høvuðsvenjari, og Hegga Samuelsen, hjálparvenjari, arbeitt við einum hópi, ið taldi 26 spælarar, sum síðani skuldi skerast niður í 20.
Tilsamans níggju venjingar við bruttohópinum hava verið á skránni, og nú er greitt, hvussu endaligi hópurin sær út, og hvørjir teir 20 verða, ið skulu dystast við norðurmakedónar.
Hópurin:
Silas Eyðsteinsson, 07 Vestur
Bárður á Reynatrøð, Víkingur
Victor Emil Boje Henriksen, Hvidovre (Danmark)
Ari Olsen, Skála
Bjarni Petersen, B36
Andrias Edmundsson, Sunderland FC (Ongland)
Ólavur Niclasen, KÍ
Andri Benjaminsen, NSÍ
Jákup B. Andreasen, KÍ
Lukas Grenaa Giessing, AB
Petur Knudsen, NSÍ
Daniel Johansen, HB
Hugin Samuelsen, B36
Magnus Holm Jacobsen, B36
Stefan Radosavljevic, B36
Pætur Petersen, HB
Mads B. Mikkelsen, Vendsyssel FF (Danmark)
Hannes Agnarsson, B36
Adrian Justinussen, HB
Steffan Løkin, EB/Streymur
