335.000 fólk hava mist streymin í russiskum álopi á ukrainska høvuðsstaðin, Kyiv í nátt.
Tað upplýsir orkuveitarin, DTEK, sambært Reuters.
- Barbariska russiska álopið í morgun eigur at verða ein vekjari til heimsleiðararnar, sum eru savnaðir í býnum, Davos í Sveis.
Tað skrivar ukrainski uttanríkisráðharrin á X, fyrrverandi Twitter.
Ukrainski forsetin, Volodymyr Zelenskyj, sigur sambært Reuters, at Russland í nátt hevur brúkt fleiri enn 300 dronur og eitt "munandi" tal av krússararakettum og ballistiskum rakettum í álopinum.
Ukrainsku myndugleikarnir siga, at landinum tørvar stuðul til undirstøðukervið, loftverju, eins og heitt verður á sameind lond um at seta fleiri revsitiltøk í verk móti Russlandi.
Hesa vikuna eru politiskir leiðarar og vinnulívsfólk úr øllum heiminum savnað í Davos í Sveis, har ársfundur er í World Economic Forum.
Í skjótt fýra áralanga krígnum móti Ukraina, hava russar serliga lagt seg eftir at raka undirstøðukervið í Ukraina í kaldastu tíðini av árinum.
Hetta hevur higartil verið kaldasti vetur í landinum í fleiri ár. Herfyri høvdu ukrainar fyglgjandi nætur við heili 20 kuldastigum, og tá streymurin fer, missa ukrainar bæði hita og vatn.
Endamálið við russisku álopunum á undirstøðukervið í Ukraina er at fáa ukrainska fólkið at venda sær ímóti landsins leiðslu.
##med2##
