Á middegi í gjár boðaði Aksel V. Johannesen, landsstýrismaður í heilsumálum frá, at Landsstýrið á fundi um morgunin hevði gjørt av, at allir føroyingar eiga at fáa tilboð um at verða kannaðir fyri arvaligu dreparasjúkuna CTD, áðrenn tvær vikur eru farnar.
Ætlanin er, at øll PKU-kort hjá teimum, sum eru fødd eftir 1986 verða kannað, umframt, at fólk, sum eru í familju við CTD sjúklingar, skulu kannast beinanvegin. Øll onnur fáa tilboð um at verða kannað fyri eitt lítið egingjald.
- Hetta var tað besta, sum kundi henda, sigur Ulrike Steuerwald, barnalækni, við Sosialin. Tað var hon, sum upprunaliga fann sambandið millum brádligan deyða hjá føroyskum smábørnum og sjúkuna CTD.
Ulrike Steuerwald heldur tað vera líkamikið hvar ella hvør ger kanningarnar, bara at tey, sum bjóða seg fram, kunnu gera tær beinanvegin.
- Heldur í dag enn í morgin, sigur hon við Sosialin, og vísir á, at hóast talan ikki er um so nógv fólk, hevur tað stóran sálarligan týdning fyri tey, sum eru bangin.
- Tí er tað eisini í lagi, at tey, sum ikki eru í vandabólki, rinda eitt sindur sjálvi, sigur Ulrike Steuerwald, sum staðfestir, at tað er sera umráðandi, at fólk koma í viðgerð beinanvegin, hava tey ov lágt Carnitinetal. Sostatt mugu fólk ikki bíða, til aftan á eina ílegukanning, sum tekur fleiri vikur at fáa úrslitið av.
Landsstýrið ætlar eisini at gera eina klinisk-genetiska vegleiðing her í Føroyum, og eina CTD-kanningarskrivstovu. Tað hevur í mong ár verið ynski frá heilsuverkinum, og ikki minst frá Ulriku Steuerwald, at fáa eina føroyska klinisk-genetiska starvsstovu við serligum førleika til føroyskar ílegusjúkur og –gransking.
