Síðsta sunnudag var dystur í Gøtu ímillum GÍ og HB. HB vann dystin 2-1. Dómari til dystin var Kim Ejdesgaard ?úr Fram?.
Nógv fólk vóru komin at síggja ein góðan fótbóltsdyst, sum tað so mangan er tá hesi bæði liðini møtast. Men dómararnir henda dagin vildu tað øðrvísi. Tí dómara avrikið hendan dagin var eitt tað fúlasta ið nakrantíð hevur verið at sæð í hesum landi. Frá fyrsta bríksli var eingin ivi um, at Kim vildi hava gøtumenn niður við nakkanum. Í fyrsta minutti dettur ein HB´ari í GÍ brotsteiginum, og heilt óvæntað verður brotsspark dømt. Fólk kring vøllin sóu týðiliga, at hetta ikki átti at vera brotspark og enntá viðkomandi HB´ari sum fór um koll, segði eftir dystin, at hetta einki hevði við brotspark at gera. Málverjin hjá GÍ fekk eisini gult kort í hesum sambandi. Lítla løtu seinni hevur GÍ málverjin lofta bóltinum og skal til at sparka út, men nú bríkslar dómarin aftur, fyri at málverjin var uttan fyri 16-metur-linjuna áðrenn hann sleppur bóltinum -hetta hóst tað sæst týðiliga á sjónbandsupptøkum, at málverjin er góðar 2 metur innanfyri, tá ið hann sleppur bótlinum. HB fær fríspark og GÍ málverjin fær seinna gula kortið, og verður rikin av vøllinum. Gøtumenn máttu nú leika 10 manns meginpartin av dystinum, og av tí at eingin eykamálverji var, máttu teir seta ein av bestu útileikarunum at verja málið. Somuleiðis í fyrra hálvleiki boksar ein HB´ari bóltin í egnum brotsteigi, men nei - gøtumenn fáa ikki brotsspark. Í seinna hálvleiki var trunkaspæl í HB brotsteiginum, í útvarpinum varð sagt, at HB´arnir bjargaðu tríggjar ferðir á málstrikuni, men fleiri av ákoðarunum ið stóðu tætt við, vildu vera við, at bólturin hevði verið innan fyri linjuna tvær ferðir.
So er tað eg spyrji, fáa opinlýst vánalig og órættvís dómaraavrik ongar avleiðingar fyri viðkomandi dómarar. Eitt er víst, tað hevur stórar avleiðingar fyri liðið ið órættur verður gjørdur ímóti. Dysturin er tikin uppá sjónband og FSF hevur fingið eitt kopi av hesum bandi, spurningurin er bara um teir tora at gera nakað við hetta. Og hvussu við dómarafelagnum, eru teir so fáir dómarar, at teir ikki tora at banna einum at døma, ið als ikki er egnaður til tess. Ella halda teir hondina yvir hvørjum øðrum. Tí Kim Ejdesgaard kemur sera sjáldan væl frá síni døming. Og hví kunnu havnarmenn døma havnarlið, tá t.d. klaksvíkingar ikki kunnu døma KÍ. Kanska eru Kim og hansara menn HB´arar, tí sum øllum fótbóltsáhugaðum kunnugt, mátti HB hava øll trý stigini í Gøtu fyri at hava nakrar vónir at røkka meistara heitinum. Á pappírinum stóð næsti dysturin hjá HB at vera á útivølli móti GÍ, vit sum fylgja við í fótbólti vita hvussu torførir hesir dystir plaga at vera hjá HB. Man fær næstan hug at spyrja, vóru HB 11 manns, ella vóru teir 14. Møguliga er Kim Ejdesgaard bara tápuligur, ella hann hevur okkurt ímóti Gí, ella hann kanska hevur fingið pengar undir borðinum - hvør veit, tað fæst nokk heldur aldri greiða á, tí fyri føroyskar dómarar ber alt til, sær tað út til.
Sólarn Solmunde
