Gerhard Lognberg
Nicolina er úr góðum bergi sprotin. Eisini veit hon so væl úr teimum Heilagu skriftum. Eingin skal verða í iva um, at eg persónliga haldi, at Nicolina hevur ótrúligar holdningar til Guds orð, men Gud havi lov, at vit hava rætt at siga tað vit vilja í okkara landi.
Einaferð í einum skrivi hevði tú at fólki, sum bukaðu onnur í høvdið við skriftstøðum úr Bíbliuni.
Nú haldi eg, at flest fólk sum tú ikki er samd við, ganga við nógvum pentum í høvdinum, sum tú bukar onnur við skriftstøðum.
Skriftstøðini úr bíbliuni og artiklarnir eru so langir, at man næstan noyðist út í tún at lesa teir.
Men eg rokni bara við, at tú meinar tað tú sigur, og tað ger meg enn meira ørkymlaðan.
Men tá tú fer at gremja teg um, at løgtingmenn eru til bønarmøti, so standi eg púrasta á berum - og eri málleysur!
Er tú so uppgirað, av tí at grein 266b varð samtykt, og sær bara fyri tær, at best var at øll vóru kynsvillingar!
Aftur til bønarmøtini, sum tú so staðiliga fráræður.
Tú sigur, at tú hevur hoyrt, at tingmenn hava bønarmøti áðrenn tingfundin, og tað fráræður tú staðiliga.
Nicolina, og hvat so? Gævi at so var. Eg veit einki um hesi bønarmøti. Neyvan eru tey, tí slíkt verður vælsaktans ikki hildið loyniligt.
Men Nicolina, tað eru andaktir umleið einaferð um mánaðin niðri á Gamla Apoteki, hevði tað kanska verið betur at slíkt ikki var loyvt, eg spyrji bara.
Um onkur hevur bønarmøti í løgtinginum, so vildi eg gjarna verið við, tí eg havi brúk fyri bøn og forbøn.
Men Nicolina, umskylda at eg sigi tað. Er tú ikki á markinum, at fara ov langt, hvat øðrum sum tú metir ikki eru líka trúgvandi sum tú?
Til seinast, er tað nakað vit í okkara landi hava brúk fyri, so er tað fólk, sum folda hendur og rópa til hin livandi Gud, bæði á bønarmøti og í loynikamarinum.
Eg føli meg noyddan at svara tær aftur, tí tann, ið tegur, hann samtykkir verður sagt.
