– Gev okkum fólkaræði aftur!
Tað er boðskapurin hjá Javnaðarflokkinum, sum í almennari fráboðan heitir á løgtingið um at burturvísa uppskotinum um privatan Eysturoyartunnil, tí málið er so illa frágingið og upplýst.
Sambært Aksel V. Johannesen, so heldur Javnaðarflokkurin, at landsstýrið í handfaringin av málinum um privatan eysturoyartunnil hevur brotið lógina um alment innlit og lógina um ábyrgd landsstýrismanna.
Javnaðarflokkurin heldur eisini, at uppskotið hjá landsstýrismanninum er í stríð við tingskipanina.
– Í okkara demokratisku skipan ber ikki til, at landsstýrismaðurin dylir og heldur aftur upplýsingum fyri tinginum. Tað er ongantíð upp til landsstýrimannin at gera av, hvørjar upplýsingar fólkavalda løgtingið hevur fyri neyðini, fyri at kunna viðgera og avgreiða eitt mál, sigur Aksel V. Johannesen.
– Tað er og skal vera Løgtingið – ikki landsstýrismaðurin – sum ger av, hvørjum upplýsingum tørvur er á í sambandi við viðgerð av einum løgtingsmáli, sigur hann.
Hesa meginreglu í fólkaræðinum heldur Javnaðarflokkurin, at landsstýrismaðurin í innlendismálum so dyggiliga brotið í málinum um privatan eysturoyartunnil.
– Í einum rættarsamfelag eigur slíkt at fáa avleiðingar við brestin. Men hetta hendir ikki í hesum føri. Tvørturímóti verður alt hetta lógloysi vælsignað og stuðlað av einum løgmanni, sum alment hevur blástemplað, at landsstýrismaðurin í innlendismálaráðnum afturheldur týðandi upplýsingar fyri tinginum. Løgmaður misrøkir tískil so dyggiliga sína skyldu at hava eftirlit við landsstýrismanninum, er greiði boðskapurin hjá Akseli V. Johannesen
Víðari sigur Javnaðarflokkurin í skrivinum, at landsstýrimaðurin ikki bara afturheldur og dylir upplýsingar fyri tinginum. Hann hevur eisini niðurbundið løgtingið til at avgreiða málið innan ávísa tíðarfreist – tí annars skal Føroya fólk rinda danska felagnum eina millión krónur í endurgjaldi.
Javnaðarflokkurin dugir ikki at síggja, at landsstýrimaðurin hevur nakra materiella heimild til at gera eina slíka avtalu, har Løgtinginum verða álagdar dagbøtur. Tískil hevur landsstýrismaðurin eisini í hesum føri handlað í heimildarloysi.
– Avleiðingin av framferðarháttinum hjá løgmanni og landsstýrismanninum er, at tað ikki longur er fólkavalda løgtingið, sum leggur lóggávuarbeiðið til rættis, men eitt danskt felag, sum sjálvsagt vil gera alt fyri at fáa einarætt til at byggja, reka og eiga hendan lukrativa tunnilin í upp til ein mansaldur. Alt hetta hendir bara, tí vit hava ein løgmann, sum antin ikki hevur vilja ella ikki hevur førleika til at røkja skyldu sína at hava eftirlit við landsstýrisfólkunum, so tey virka í samsvari við galdandi lógir og heimildir, sigur Aksel V. Johannesen í brævinum.
Javnaðarflokkurin krevur tí, at fólkaræði verður virt, og fer tí at heita á løgtingið um at vísa málinum burtur sambært grein 37 í tingskipanini.
– Henda grein ásetir, at mál skulu vera væl og virðiliga upplýst fyri tinginum. M. a. skal upplýsast, hvat málið snýr seg um, hvør fíggjarligi kostnaðurin er, hvørjar viðmerkingar almennir stovnar hava – alt til tess at tryggja, at Løgtingið hevur møguleikan at viðgera uppskotið til lítar. Lógaruppskotið hjá landsstýrismanninum lýkur als ikki hesar treytir, sigur Aksel V. Johannesen.
