Og formaðurin er als ikki bangin fyri, at flatskatturin skal gera tað, at arbeiðaralønirnar fara at standa í stað eftir 1. mai, eins og lønir hjá limum Starvsmannafelagsins gjørdu.
Tí Føroya Arbeiðarafelag fer at samráðast hesa ferð akkurát á sama hátt sum seinast. Feløgini hava havt fleiri fundir sínamillum, men tey eru ikki liðug at útgreina krøvini enn.
Men Georg F. Hansen slær fast, at tað als eingin ivi er um, at feløgini fara at krevja lønarhækking – og tey hugsa als ikki um, hvat feløgini á almenna arbeiðsmarknaðinum hava fingið, tí karmurin, sum er lagdur fyri almenna arbeiðsmarknaðin hevur einki við arbeiðarafeløgini at gera, sigur Georg F. Hansen.
Og at vísa lønarafturhald við tilsiping til flatskattin, tað hjálpir einki, ger Georg Hansen greitt, tí hansara limir fáa ongan ágóða av flatskattinum.
Og rætt hevur hann.
Um tað kanska er ov tíðliga at gera niðurstøður, nú bara tveir mánaðir eru farnir av flatskattaárinum, so vísa tølini tó, at landsskattainntøkurnar eru nógv lækkaðar. Men tølini vísa eisini, at skattingin av pensjónin við inngjaldi kompenserar nøkulunda tapið við landsskattinum. Men tað var jú eisini meiningin hjá landsstýrinum. Pensjónir hjá lág og miðalløntum, sum verða harðari skattaðar við inngjaldi, rinda tað tap, sum landskassin fær av skattalættanum til tey ríku.
Tær samráðingar, sum hava verið á privta arbeiðsmarknaðinum, hava givið væl betur – upp í eini trý prosent í lønarhækking í eitt tvey ára skeið. Og tá hevur Føroyar Arbeiðsgevarafelag roynt at víst afturhald.
Til komandi samráðingarnar við Arbeiðarafeløgini fáa vit so at síggja, um Føroya Arbeiðsgevarafelag hevur lært av Jørgen Niclasen og hansara fólki – og um tey fara eftir eini nullloysn, ella kanska fara at krevja lønarlækking.
Men tað er valla hugsandi.
