Amerikanska greiningarfyritøkan, The Institute for the Study of War (ISW), heldur, at tað tykist sum leiguhermenninir hjá Wagner hava tikið ein taktiskan steðg í ukrainska býnum, Bakhmut.
Tað veit Sky News at siga.
Russiskar herdeildir, íroknað Wagner-leiguhermenninir, sum berjast á russiskari síðu, hava í seinastuni lagt stóran dent á at taka ukrainska býin, sum fyri kríggið hevði stívliga 70.000 íbúgvar.
Tað eru tey, sum spáa, at býurin helst fer at fella í russiskar hendur innan stutta tíð. Útlendskir miðlar vistu í gjár at siga, at russar hava ræðið á umleið helvtini av sundurbumbaða býnum.
Fyrst í hesi vikuni varð sagt, at Wagner-herdeildirnar høvdu tikið ræðið á eystara parti av býnum, og nú verður mett, at stríðandi partarnir sita á umleið helminginum av býnum hvør.
ISW heldur, at óvissa ræður um, hvønn leiklut Wagner-herliðini fara at fáa í komand álopum á Bakhmut, tí leiguhermenninir hava seinastu dagarnar ikki verið sæddir í bardøgum um býin.
Greiningarfyritøkan heldur tað ikki vera óhugsandi, at Wagner-hermenninir taka ein taktiskan steðg, meðan bíðað verður eftir, at fleiri russiskar herdeildir koma til Bakhmut.
Í dag verður eisini víst til ein Tvitter-vanga, Donbass Today, sum hevur 30.000 fylgjarar.
Her verður sagt, at Wagner-herlið nú eru byrjað at taka seg inn í eitt ídnaðarøki har norðuri í býnum, men hesi tíðindi eru ikki váttað av almennum keldum.