Í morgin verður fjórða umfar í Premier League. Fleiri sppælarar kunnu fáa debut fyri sítt nýggja felag, meðan aðrir, sum vóru á veg út, nú skulu halda fram í sínum felagi. Ein teirra er tann so nógv umtalaði Philippe Coutinho í Liverpool.
Hann bað persónliga um at sleppa til FC Barcelona, men Liverpool segði kortanei. Heldur ikki eitt boð upp á eina milliard krónur fekk Liverpool til at umhugsa at selja brasilska landsliðsspælaran. Jurgen Klopp, týski venjarin hjá Liverpool, hevur boðið honum vælafturkomnum til venjing, men hevur ikki tikið hann við í hópin til dystin móti Manchester City í morgin.
Pep Guardiola, venjari hjá Manchester City, váttaði í dag, at felagið gjørdi eina roynd at keypa Alexis Sanchez úr Arsenal, men avsannaði at Raheem Sterling skuldi brúkast sum mótvekt.
Av spælarum, sum hava skift síðani seinasta umfar kunnu nevnast Danny Drinkwater (Leicester) og Davide Zappacosta (Torino) til Chelsea, Mamadou Sakho (Liverpool) til Crystal Palace, Alex Oxlade-Chamberlain (Arsenal) til Liverpool, Renato Sanches (Bayern Munich) leigaður til Swansea, Wilfried Bony (Manchester City) til Swansea, og Serge Aurier (Paris Saint-Germain) og Fernando Llorente (Swansea City) til Tottenham.
Premier League 4. umfar:
Leygardagin:
12:30 Manchester City - Liverpool
15:00 Arsenal - AFC Bournemouth
15:00 Brighton & Hove Albion - West Bromwich Albion
15:00 Everton - Tottenham Hotspur
15:00 Leicester City - Chelsea
15:00 Southampton - Watford
17:30 Stoke City - Manchester United
Sunnudagin:
13:30 Burnley - Crystal Palace
16:00 Swansea City - Newcastle United
Mánadagin:
20:00 West Ham United - Huddersfield Town