Manchester United spældi seg í gjárkvøldið í finaluna í ensku steypakappingini, EFL Cup, hóast at teir taptu seinna uppgerðina móti Hull 2-1 á útivølli. Samanlagt var tað tó nokk, tí í fyrru uppgerðini vann Manchester United 2-0, soleiðis at samanlagda úrslitið gjørdist ein 3-2 sigur til teir reyðu úr Manchester.
Men hóast Hull vann dystin 2-1 í gjár, vildi Manchester United venjarin, José Mourinho, ikki viðurkenna dystin aftaná sum eitt tap.
- Vit taptu ikki dystin. Hann endaði 1-1, svaraði Mourinho ensku miðlunum aftaná dystin.
Tá so miðlarnir søgdu við hann, at dysturin endaði altso 2-1 til Hull, og at Manchester United tapti dystin, svaraði Mourinho.
- Eg sá bara tvey mál í dystinum. Tað hjá Pogba og so eitt mál hjá teimum sum var framúr gott eftir eitt innlegg til aftaru stong.
José Mourinho sipaði sostatt til at fyrra málið í dystinum, ið var eitt brotsspark, var eitt serstakliga tunt brotsspark, sum aldrin skuldi verið dømt. Tí valdi hann ikki at telja tað málið við.
Tapið hjá Manchester United í gjárkvøldið var annars tað fyrsta tapið hjá felagnum í 18 dystir.
Hull - Manchester United 2-1 (1-0)
1-0 Tom Huddlestone (Brotsspark), 35.
1-1 Paul Pogba, 66.
2-1 Baye Oumar Niasse, 85.