Danska fótbóltslegendan, Jon Dahl Tómasson hevur nú staðið á odda fyri svenska landsliðnum í tveir dystir.
Farna hóskvøld endaði Svøríki á útivølli í einum sonnum portugisiskum ódnarveðri, og gjørdist talan um eitt 2-5 stórtap.
Tí var eitt ávíst trýst á Tómasson og liðið hansara, ið tók ímóti Albania - úr okkara EM-undankappingarbólki - á Friends Arena í Solna uttanfyri Stokkhólm.
Gustaf Nilsson syrgdi við einum góðum stútara í 62. minutti fyri, at Tómasson fekk tann fyrsta sigurin sum svenskur landsliðsvenjari.
Svøríki hevði væl fleiri royndir á málið enn Albania, og vann ein uppibornan sigur.
Grundlógardagin, 5. juni spælir Svøríki venjingardyst móti Danmark í Parkini í Keypmannahavn. Tað verður ein serlig løta fyri Tómasson, ið millum 1997 og 2010 spældi 112 landsdystir og skoraði heili 52 mál fyri Danmark.
8. juni spælir Svøríki á heimavølli venjingardyst móti Serbia.
Svøríki er í Nations League Deild C í bólki saman við Slovakia, Aserbadjan og Estlandi.