Felags fyri liðini, sum hava kvalifiserað seg at spæla í hálvfinalunum í kappingini um løgmanssteypið er, at tey áður hava vunnið steypið.
Tó er talan um eitt undantak. Undantakið er 07 Vestur, sum í kvøld og við sigri ímóti TB í Trongisvági hevur tryggjað sær rætt at spæla hálvfinalu.
Ætlanin var, at fyrsta bríkslið við Stórá í Trongisvági skuldi vera klokkan 15. Tað var tó av ongum. Vindurin var nógvur, og so varð dysturin útsettur til í kvøld.
Í góðum líkindum vann 07 Vestur 4-1 eftir hálvleiksstøðuna 2-1. Tíðliga í seinna hálvleiki var tað greitt, at atgongumerkið til hálvfinaluna fór at vera í viðførinum hjá gestunum.
Fýra minuttir undan steðginum minkaði TB um munin til 2-1. Málskjðutti var Jóhan Renéson Thomsen, og ein annar av teimum innføddu á TB liðnum, Andreas Midjord, átti uppleggið.
TB hevði eftir steðgin hug at leggja nógv fyri í framrættaða partinum, men tað eydnast ikki at javna. Heldur vóru tað gestirnir, sum eftir lítlari løtu miðskeiðis í seinna hálvleiki skoraðu tvey mál. Málskjútti í fyrra førinum var Ronni Møller-Iversen, og uppleggið átti Mads Borchers. Tveir minuttir seinni økti Mads Borchers um munin til 4-1, og so megnaði TB ikki at svara aftur.
Ronni Møller-Iversen setti hol á og skoraði til 1-0, tá ið eitt lítið korter var farið, og sjey minuttir undan steðginum var tað miðvallarin Janus Svabo Samuelsen, sum skoraði.