Eirikur Lindenskov
Kristin Michelsen er tann hægst lønti politikarin í Føroyum. Sum løgtingsmaður og sum borgarstjóri á Tvøroyri fær hann um 100.000 krónur um mánaðin í løn og skattafríum endurgjaldi. Hann er soleiðis nógv tann hægst lønti politikarin í Føroyum.
Áður hevur tað verið eitt gott beiti bæði at sita sum løgtingsmaður og fólkatingsmaður í senn. Tá kundi tú fáa eina fulla løn sum fólkatingsmaður og eina fulla løn sum løgtingsmaður. Tað fingu bæði Høgni Hoydal og Edmund Joensen, sum til ávikavist fólkatingsvalið og løgtingsvalið í 2011 høvdu bæði størvini.
Edmund Joesen stillaði ikki uppaftur til løgtingið, og Høgni Hoydal varð ikki afturvaldur í Fólkatingið. Sjúrður Skaale, sum nú er fólkatingsmaður fyri Javnaðarflokkin, stillaði heldur ikki uppaftur til løgtingsvalið, og tí hava vit fyri fyrstu ferð tveir fólkatingsmenn, sum ikki eru løgtingsmenn.
Landsstýrisfólk og løgmaður kunnu ikki sita í tinginum og landsstýrinum í senn. Tí verða tað annaðhvørt tey, sum sita sum fólkatingsfólk og løgtingsfólk, ella sum borgarstjórar og løgtingsfólk í senn, sum eru hæst løntu politikarar í Føroyum.
Jógvan Skorheim, sum er nýggjur borgarstjóri í Klasvík, hevði fingið á leið somu løn sum Kristin Michelsen, um hann valdi bæði størvini. Men hann hevur valt løgtingsstarvið frá fyri at røkja borgarstjórastarvið til lítar.
