AB - TB 2-1 (1-0)
Tróndur Arge – Argir
Tað ber til. Tað halda argjamenn í hvørtfall. Hóast teir aftaná 11 umfør bara høvdu tvey stig, so er luft komið í bjargingarbátin, sum nú flýtur betri enn bjargingarbáturin hjá 07 Vestur. Við tveimum sigrum og einum javnleiki hevur AB klatrað upp á níggjunda pláss við níggju stigum. Frástøðan til bjargingina er eisini minkað úr 11 stigum niður í sjey stig.
Tað er framvegis langt á mál, men í seinasta dystinum fyri summarsteðgin fær AB vitjan av NSÍ. Eydnast tað aftur AB at vinna, so verður aftur spenningur um niðurflytingina.
Perlufríspark
Argjamenn vóru uttan liðskiparan Jónas Stenberg, sum sat uttanfyri fyri leikbanni. Í hansara stað kom Leivur Holm Joensen, meðan Rói Danielsen kom inn í miðverjuna. Hetta riggaði bara væl.
Poul Ingason og Ragnar Tausen sóu út til at vilja bjóða AB av. Einar tvær ferðir kom Poul Ingason í góðar støður eftir uppspæl frá millum annað Rangnari Tausen.
Í hinum endanum varð Sorin Anghel feldur, tá hann hegnisliga sneiddi framvið Babacar Ndiour. Stutt uttanfyri brotsteigin sendi Dion Splidt frísparkið so beint upp í málhornið til 1-0. Ein perla av einum frísparki. Bæði Rógvi Poulsen og Sorin Anghel høvdu royndir á mál, meðan Nicky Diverdics fekk helst størsta møguleikan í dystinum, tá hann brádliga stóð púra leysur inni í fimm metrinum og stútaði. Onkursvegna stútaði hann á Símun Rógva, sum illa nokk megnaði at blinka áðrenn hann bjargaði. 1-0 í hálvleikinum.
Reytt kort og mál
Stutt fyri hálvleik rendi Poul Ingason saman við AB spælara og fekk sjónliga ilt í lærið. Tá hann kom út til seinna hálvleik var øllum greitt, at hann fekk ikki hildið fram og í hansara stað kom Aron Sørensen.
Aron hevði verið á vøllinum í tíggju minuttir, tá hann bleiv feldur við beinari leið móti málinum. Dómarin valdi at geva Leivi Holm Joensen reyða kortið og tað var eisini at síggja til í ordan. Verri gjørdist støðan fyri argjamenn, tá Babacar Ndiour sendi frísparkið beinleiðis í málið til 1-1.
Nú skuldi ein trú, at TB setti seg á dystin og fór at trýsta fyri at vinna, men eins og í Klaksvík fyri viku síðan, so spældi AB næstan betri við tíggju monnum.
Morten avgerð
Seinasti hálvi tímin var undirhaldandi, tí bæði liðini spældu fyri at vinna. AB skifti út, so Bjartur Kjærbo kom á vøllin, meðan TB umskipaði seg við Babacar Ndiour sum fremsta manni. Helst mundi AB eiga tveir teir størstu málmøguleikarnar at koma á odda, tá fyrst Bjartur Kjærbo úr góðari støðu skjeyt uppum, og í aðru altøgu, tá Rói Danielsen stutaði á stongina.
Avgerandi løtan kom lang inni í yvirtíðini, tá Rógvi Poulsen sendi hornaspark innfyri. Morten Overgaard, besti spælarin á vøllinum saman við Dion Splidt, setti høvdið á bóltin og stútaði hann í málið til 2-1.
Gleðin var at fáa eyga á. Í næstan alt ár hevur tað koppað til fyrimuns fyri mótstøðuliðið hjá AB, men tríggjar dystir upp í slag hevur AB nú fingið stig, og tveir dystir upp í slag hevur AB skorað í yvirtíðini.
Bjargingarbáturin hjá argjamonnum er flotaður, nú er spurningurin um teir klára at fáa nokk av luft í bátin?
