Heimskendi hittbólkurin fer at spæla á Vágsbø í annaðkvøld.
Aqua telist millum stóru poppnøvninum frá nítiárunum, og ikki minst risahittið »Barbie Girl« gjørdi, at bólkurin varð kendur um allan heimin – og framvegis er tað.
Tað var í 1994, at tónleikararnir í Aqua fyrstu ferð funnu saman, og tvey ár seinni kendi allur heimurin bólkin. Fyrsta risahittið hjá Aqua var Barbie Girl, og so var leiðin slóðað inn á hitlistarnar, har eisini sangir sum My Oh My, Doctor Jones, Turn Back Time, Cartoon Heroes, Around The World og aðrir sangir klatraðu upp á tindarnar.
Part av 00’unum høvdu tónleikararnir í Aqua solokarrieru, men í 2008 funnu tey saman aftur og hava síðani framført kring allan heimin. Nú er tíðin komin, at Aqua kemur til Føroya við øllum teirra stóru hittum og fer at geva føroyingum ársins festligastu konsert á Vágsbø.
Lene Nystrøm, René Dif og Søren Rasted eru høvuðsfólk í Aqua, og afturat sær hava tey ein egghvassan tónleikabólk, sum lyftir løttu poppsangirnar hjá Aqua upp á ein høgt tónleikastig á pallinum.
Aqua spælir á Vágsbø hóskvøldið kl. 22.00.
