Fyri góðari viku síðan var eitt lítið flogfar saknað á leiðini við grønlendsku Sermitsiaq-oynna, nærindis grønlendska høvuðsstaðnum, Nuuk.
Seinasta mánadag varð flogfarið funnið, og síðan tá hava myndugleikarnir í Grønlandi samstarvað um at sleppa nærri niðurdotna flogfarinum.
Sum skilst, er flogfarið funnið á Sermitsiaq-fjallinum, sum er fjallið á myndini omanfyri.
Umstøðurnar eru truplar, men roynt hevur verið at sleppa nærri vrakinum úr luftini.
Smáflogfarið við einum motori var komið úr Kanada, og bert flogskiparin var í flogfarinum. Tað er eingin møguleiki fyri, at flogskiparin er á lívi.
Grønlands Politi og Skaðanevndin eru í tøttum samstarvi í arbeiðnum at kanna umstøðurnar kring vanlukkuna og vanlukkustaðið, men higartil hevur hetta ikki eydnast.
- Vit arbeiða framhaldandi saman við Arktis Kommando og lokalu bjargingarmyndugleikunum um at sleppa nærri vanlukkustaðnum.
Leiðarin á vaktsentralinum hjá Grønlands Politi, Brian Thomsen, segði fyri tveimum døgum síðan, at partarnir, sum samstarva, arbeiða við at finna eina trygga leið til vanlukkustaðið.
Hetta veit grønlendska kringvarpið - www.knr.gl - at siga.
