Fimtanda umfar í næstbestu fótbóltsdeildini er á skránni seinnapartin. Suverena toppliðið TB fær vitjan av teimum næstbestu hjá AB. Tá ið TB var á Argjum fyrr í ár, var úrslitið 1-0 til TB, sum skoraði einsamalla málið, tá ið ein tími var farin.
FC Suðuroy, sum er næstfremst, er á veg til Runavíkar. Tá ið liðini fyrr í ár hittust á Vágseiði, vann FC Suðuroy 1-0.
Triðja liðið, sum kann flyta upp, er 07Vestur. Í dag fáa vágamenn vitjan av EB/Streymi. Tá ið hesi liðini hittust við Margáir, vann 07Vestur 2-0.
Tveir dystir vera í Gundadali. Tann fyrri er millum B36, ið framvegis er á heiðursmerkjaplássi, og Víking. B36 vann 3. mai 1-0 í Leirvík.
Seinni dysturin er millum HB og KÍ. Serliga fyri HB, sum er illa spert á aftasta plássi, er talan um lyklauppgerð. Hesi bæði liðini eru á niðurflytingarplássunum. 3. mai var úrslitið teirra millum í Klaksvík málleysur javnleikur. Mikukvøldið vann KÍ 4-0 á útivølli ímóti EB/Streymi. Mikukvøldið legði HB rygg til 7-1 tap í Runavík.
NSÍ-FC Suðuroy: Kári J. á Høvdanum kl. 15.00
07Vestur-EB/Streymur: Johan Petur Michelsen kl. 15.00
B36-Víkingur: Ransin N. Djurhuus kl. 13.45
HB-KÍ: Vinjard Dam kl. 16.15
TB-AB: Páll Augustinussen kl. 15.00
Støðan
TB 43
FC Suðuroy 24
B36 24
NSÍ 22
07Vestur 22
AB 21
Víkingur 19
EB/Streymur 11
KÍ 10
HB 5
TB og EB/Streymur hava spælt 15 dystir, og hini liðini hava spælt 14 dystir
