Tað er Jóhannus Joensen, tingmaður fyri Javnaðarflokkin, sum hevur sett landsstýriskvinnuni, Margit Stórá, ein grein 52a fyrispurning um málið. Hann spyr soleiðis:
1. Nær ætlar landsstýriskvinnan at leggja fyri Løgtingið lógaruppskot um eina smidligari barsilsskipan?
2. Kann landsstýriskvinnan greiða frá, hvussu hetta ætlandi skal skipast, og í hvønn mun hetta fer at geva foreldrum frælsi at verða longur heima hjá børnunum?
Margit Stórá sigur í svarinum, at lógaruppskotið um at gera broytingar í barsilslógini væntandi verður lagt fyri Løgtingið í februar komandi ár.
Hon sigur víðari, at ætlanin er at finna eina hóskandi loysn til smidligari barsilsskipan saman við pørtunum á arbeiðsmarknaðinum.
– Enn er avgerð ikki tikin um, júst á hvønn hátt Barsilsskipanin best kann gerast smidligari, sigur hon.
Hon sigur, at tær loysnirnar, sum higartil hava verið umrøddar í politisku skipanini, eru m.a.
• at barsilsfarloyvið við útgjaldi kann “toyggjast”, soleiðis at barsilsfarloyvið t.d. kann vera 58 vikur við 90 % útgjaldi, ella 65 vikur við 80 % útgjaldi, ella 74 vikur við 70 % útgjaldi.
• at barsilsfarloyvið kann flættast, soleiðis at t.d. 39 vikur eru við 100 % útgjaldi, og 26 vikur eru við 50 % útgjaldi.
• nakrar vikur kunnu goymast í eitt ávíst áramál.
• foreldur kunnu taka allar vikurnar samstundis.
• ongar vikur av barsilsfarloyvinum/ -peninginum eru markaðar til ávíst foreldur.
• “klippikortskipan” til barsilspengar, sum kann nýtast eftir tørvi innan eitt ávíst áramál.
– Hetta skal ikki síggjast sum annað enn hugskot, tí at ein loysn má finnast, sum hóskar bæði arbeiðstakarum og arbeiðsgevarum. Serliga skal havast í huga, at arbeiðsgevararnir skulu hava møguleika at leggja arbeiðið til rættis, hóast rætturin til barsilsfarloyvið verður strektur yvir eitt longri tíðarskeið enn nú, sigur hon.
– Tí kann tað hugsast, at rætturin til at vera longri í barsilsfarloyvi enn nú, verður treytaður av avtalu millum arbeiðstakaran og arbeiðsgevaran í einstaka førinum, sigur hon.
– Alt hetta eru viðurskifti, sum skulu umrøðast við partarnar á arbeiðsmarknaðinum, soleiðis at finnast kann fram til eina so haldgóða skipan sum gjørligt til gagns fyri einstøku familjuna, sigur Margit Stórá, landsstýriskvinna, at enda í svarinum til Jóhannus Joensen.
