Føroyskir politikarar tora vanliga ikki framman undan einum vali at boða frá, hvørjum teir fara at samstarva við aftan á valið. Soleiðis er tað bæði í landspolitikki og í lokalpolitikki.
Samgongan í Tórshavnar býráð stendur - sambært veljarakanningini sum Sosialurin kunngjørdi mánadagin - til at fáa framgongd tilsamans. Javnaðarflokkurin stendur til at ganga 3,8 prosentstig fram, meðan Tjóðveldi gongur 2,1 prosentstig aftur. Báðir flokkar standa til at varðveita síni umboð.
Tað merkir, at Javnaðarflokkurin varðveitir síni fimm umboð, meðan Tjóðveldi varðveitir síni fýra umboð, sum flokkurin fekk á seinasta vali. Men síðani tá er fyrstvaldi býráðslimurin, Bogi Andreasen, farin úr Tjóðveldinum og upp í Fólkaflokkin. Kortini stendur Tjóðveldi til at varðveita øll umboðini.
Vit hava spurt Heðin Mortensen, borgarstjóra og Jógvan Arge, býráðslim fyri Tjóðveldi, um flokkarnir hava bundið seg til samstarv eftir valið.
Men tað hava teir ikki. Í øllum førum ikki formliga.
– Vit vilja fegin binda okkum til at samstarva við Tjóðveldi, og vit bíða bara eftir teimum. Men vit fáa einki svar, sigur Heðin Mortensen.
Jógvan Arge er ikki eins greiður, hóast hann kemur við ábendingum:
– Vit eru farin til val upp á avrik og ætlanir, sum vit hava framt og lagt saman við okkara samgongufelaga í átta ár, Javnaðarflokkinum. Vit staðfesta, at samgongan øll hevur stóra undirtøku millum borgararnar í Tórshavnar kommunu. Vit leggja okkum fyrst og fremst eftir at fáa øll fýra umboðini í hús, sum tykkara veljarakanning bendir á, at vit fara at fáa, tí vit meta, at eitt sterkt Tjóðveldi í Tórshavnar býráð er besti garanturin fyri, at tíðarinnar ódámligi landspolitikkur ikki sleppur fram at ræðinum í Tórshavnar býráð.
Um »tíðarinnar ódámligi landspolitikkur« er politikkurin hjá Fólkaflokkinum, so kann hendan útsøgnin hjá Jógvan Arge tulkast sum, at Tjóðveldi og Fólkaflokkurin í hvussu so er ikki fara at skipa samgongu, og so er bara tann eini møguleikin, at sitandi samgonga heldur fram.
Men seks dagar eru eftir til valið, og nógv kann broytast upp á ta tíð.
Sum vit hava víst á áður, so er tað vanligt, at samstarvsflokkurin hjá borgarstjóranum í Havn gevur honum knvín í ryggin. Tað hendi í 1996, í 2000 og í 2004 – men ikki í 2008.
Alternativa samgongan hesaferð kundi verið millum Tjóðveldi og Fólkaflokkin.
