Danial Viðoy útgevur á Bókadøgunum í komandi viku nýggja ungdómsskaldsøgu, sum hevur fingið heitið “Rangstøða”. Bókin er framhald av bókini “Tvístøða”, sum kom út í fjør.
Nú er høvuðspersónurin Bartal í Keypmannahavn, har hann roynir at finna seg til rættis í forvitnisligu býartilveruni. Møguleikarnir eru nógvir, og freistingarnar stórar. Júst sum gerandisdagurin er byrjaður, rennir Bartal seg í stríð, hann heldur vildi verið fyri uttan.
Danial Viðoy er av Viðareiði, hann býr á Tvøroyri. Hann er útbúgvin fólkaskúlalærari, men siglir við trolaranum Akraberg. Tá ið hann er heima, er hann vikarur í skúlanum á Tvøroyri. Hetta er onnur ungdómsskaldsøgan, hann hevur skrivað.
Ungu Føroyar geva bókina út, og tey skipa fyri útgávutiltaki í Norðurlandahúsinum mikudagin.
