Størsta vápnakeypið í Danmarkar søgu er veruleiki.
Danska verjan hevur fingið grønt ljós frá verjusemjubólkinum at keypa átta miðal- ella langtrøkkandi, landbaseraðar loftverjuskipanir fyri góðar 50 milliardir krónur.
Tað upplýsir Troels Lund Poulsen, verjumálaráðharri í Danmark, í tíðindaskrivi.
Á tíðindafundi í Verjumálaráðnum, har keypið varð lagt fram, kallaði Troels Lund Poulsen tað eitt "kvantulop" í mun til førleikan hjá Danmark at verja seg.
- Vit eru nú við til at fáa nógv betri verju fyri danska samfelagið.
Loftverjan er keypt frá fýra evropeiskum framleiðarum. Hetta merkir, at amerikanska Patriot skipanin er frávald.
Sambært Per Pugholm, stjóra á tilfars- og innkeypsstovuni hjá Verjumálaráðnum (FMI), hevur avhendingarferðin verið "avgerandi parametrið". Hann nevnir, at tað er søguliga stórur eftirspurningur eftir Patriot-skipanini.
Troels Lund Poulsen greiðir frá, at tað ikki var avgerandi fyri avgerðina, at skipanirnar eru evropeiskar og ikki amerikanskar.
Langtrøkkandi skipanin SAMP/T verður keypt frá einum fransk-italskum framleiðara og skal vera klár í 2028 ella 2029, meðan miðaltrøkkandi skipanirnar verða keyptar frá einum norskum, týskum og fronskum framleiðara.
Danmark hevur ikki havt loftverjuskipanir á landi síðani 2004.
Loftverjuskipanir eru tó longu á veg.
Í juni varð kunngjørt, at framleiðarar úr Týsklandi, Fraklandi og Noregi fara at levera stuttfarandi loftverjuskipanir til Danmarkar fyri meira enn seks milliardir krónur.
Í tíðindaskrivinum fríggjadagin stendur, at "samlaði kostnaðurin í sambandi við ognan og rakstur av luft- og rakettverjuskipanum á landi er mettur til 58 milliardir krónur í avrokningartíðarskeiðnum".
Tí hevur keypið í dag ein samlaðan prís upp á góðar 50 milliardir krónur.
Til samanberingar kostaðu tey 27 F-35 stríðsflogførini hjá Danmark slakar 16 milliardir krónur, sum var størsta einstaka vápnakeypið í Danmark higartil.
Upprunaliga vóru einar 19 til 25 milliardir krónur settar av í verjuavtaluni til keyp av loftverju á landi móti rakettum, flogførum og dronum.
Í tíðindaskrivinum stendur ikki, hvussu økta játtanin verður fíggjað.
/Ritzau/
