Fótbóltsstjørnur úr øllu herðashornum hava streymað til jarðarferðina í dag hjá Liverpool-leikaranum Diogo Jota og beiggja hansara í portugisiska býnum Gondomar, beint uttanfyri Porto.
Núverandi og fyrrverandi Liverpool-leikarar umframt núverandi og fyrrverandi portugisiskir landsliðsleikarar, sum hava spælt saman við Diogo Jota, eru millum teirra, sum eru komnir til jarðarferðina.
Liverpool luttekur við stórari sendinevnd. Leikarar, venjarar og starvsfólk eru øll til staðar, skriva ymiskar altjóða tíðindastovur.
Arne Slot, stjóri hjá Liverpool, er við. Millum annað hevur felagið havt tveir stórar kransar við til jarðarferðina. Báðir eru reyðir og formaðir sum fótbóltstroyggjur.
Ein kransur hevur nummarið 20 á. Virgil van Dijk, liðskiparin hjá Liverpool, kom við tí. Diogo Jota var í nummar 20 troyggjuni hjá Liverpool.
Hin kransurin er nummar 30, sum var nummarið, sum beiggi Diogo Jota, André Silva, bar. Hann var yrkisleikari hjá Penafiel, sum spælir í næstbestu deildini í Portugal.
Kransin til bróður Diogo Jota legði Andy Robertson. Liverpool-leikarin er ein tættur vinur hjá familjuni og var í brúdleypinum hjá Diogo Jota fyri bert tveimum vikum síðani.
Manchester City duoin Bernardo Silva og Ruben Dias og Bruno Fernandez hjá Manchester United, sum spældi á landsliðnum saman við Diogo, eru eisini við til jarðarferðina.
– Jota verður altíð í okkara hjørtum. Hann verður altíð til staðar til morgunmat, døgurða og nátturða, tá vit eru saman við landsliðnum, tá vit spæla PlayStation ella tá vit spæla kort, sigur Silva við portugisiska miðilin TVI, sambært Reuters.
Brøðurnir doyðu í eini bilvanlukku, sum hendi nærhendis býnum Zamora í Kastilia-landslutinum hósdagin. Sambært blaðnum AS vísa fyrstu kanningarnar, at beiggjarnir koyrdu á motorvegnum í einum Lamborghini og vóru í ferð við at yvirhála, tá eitt av hjólunum fekk brek.
Bilurin fór tí út av vegnum og eldur kom í. Bæði løgreglan og sløkkiliðið komu á staðið, men lívið hjá brøðrunum stóðust ikki at bjarga.
Diogo Jota var 28 ára gamal og eftir hann sita kona og tey trý børnini hjá parinum. André Silva var 25 ára gamal.
##med2##
##med3##
##med4##
##med5##
##med6##
##med7##
##med8##
/Ritzau/
