Edmund Joensen
fólkatingsmaður fyri Sambandsflokkin
Ger so væl og betal.
Tað, ið nógv hava bíðað eftir – og helst stúrt fyri – nærkast nú veruleikanum.
Ætlan er um, at sjúk og veik skulu hava rokning fyri at liggja á landsins sentralsjúkrahúsi, Landssjúkrahúsinum.
Hugsa tær!
Vælferðin í Føroyum er nú komin hagar til, at sjúkrahúsleiðslan, sum er í fíggjarligari knípu, biður lova sær at taka brúkaragjald frá sjúklingum.
Sagt verður, at rokning verður ikki skrivað, fyrr enn sjúklingurin er liðugt viðgjørdur.
Hetta er helst ein sannleiki við modifikatiónum.
Man tað ikki blíva soleiðis, at fólk gerast “frísk” við brestin, um sjúkrahúsleiðslan sleppur at skriva rokning til “frískar” sjúklingar?
Óansæð, um tað endar við, at brúkaragjald verður lagt á ella ikki, so síggja vit nú myndina av framtíðar vælferðini í Føroyum.
Gongdin er harmilig.
Fastfrysting rakar Heilsuverkið meint
Hevði tú væntað, at tað skuldi koma so vítt?
Hetta er arvurin eftir stýrið, ið vildi hava fullveldi uttan at hava ráð til tað.
Nú - eitt tíggjuár eftir, at fullveldisstýrið fekk fría atgongd til landskassan og leiðslu landsins - koma avleiðingarnar av fullkomna politiska vitloysinum, ið valdaði.
Fullveldissamgongan sá seg illa inn á Ríkisveitingina, og garparnir báðir, Høgni Hoydal og Anfinn Kallsberg, valdu tí at skera hana við uml. einum triðingi.
Harumframt skuldi hon eisini fastfrystast.
Júst fastfrystingin rakar nú sjúkrahúsini og Heilsuverkið meint.
Á myndini, ið fylgir við hesi grein, sæst skeiva gongdin. Útreiðslurnar til heilsuøkið vaksa sjálvsagt. Men Ríkisins partur av fíggingini til hesar somu útreiðslur hevur verið fastfrystur í 10 ár.
Hetta er beinleiðis orsøkin til tosið um brúkaragjald á Landssjúkrahúsinum.
Hoydal og Kallsberg vildu úthola virðið av veitingini til Heilsuverkið, og tað merkist nú beinleiðis í sama Heilsuverki. Tingini hanga saman. Allar avgerðir hava sínar avleiðingar.
Ríkismyndugleikarnir hava annars skyldu til at fíggja Heilsuverkið saman við Landsstýrinum. Hetta kemst av, at Heilsuverkið er eitt felagsmál. Tað er ikki yvirtikið.
Partarnir vóru vanir at fíggjað økið á leið helvt um helvt. Hetta sá fullveldissamgongan stórt uppá, og tí er støðan innan Heilsuverkið, sum hon er.
Lagnunar speisemi
Av sonnum má tað sigast at vera lagnunar speisemi, at Karsten Hansen, landsstýrismaður í heilsumálum, skal taka støðu til, um fólk skulu rinda brúkaragjald fyri at liggja á Landssjúkrasjúkrahúsinum.
Tað var júst sami Karsten Hansen, ið tryggjaði fullveldissamgonguni, at veitingin úr Ríkinum til landsins sjúkrahús og heilsuverk skuldi fastfrystast
Tá var hann landsstýrismaður í fíggjarmálum fyri Tjóðveldi.
Á ein hátt kennist tað rætt, at Karsten Hansen fær málið inn á sítt borð. Tað er ikki annað enn rímiligt, at fullveldisministarin sær avleiðingarnar av tí, hann førdi út í lívið fyri 10 árum síðani.
Ein heilsan til samgonguna
Tá, ið hetta er sagt, er týðandi at senda verandi samgongu eina heilsan.
Samgongan átti at skammast.
Tað er lítið virðiligt fyri okkara land, at spariknívurin verður settur á kjarnuvælferðina í samfelagnum. Pensjónistar longu verða hildnir fyri gjøldur. Nú koma so sjúklingar afturat.
Hugsa tær, um tú bæði ert pensjónistur og sjúklingur? Hví skulu veikastu bólkarnir hava slíka viðferð?
Upp aftur óvirðiligari er tað, tá ið samgongan samstundis futtar pensjónir hjá fólki av í asosialum flatskattalætta.
Sambandsflokkurin hevur eina serliga ábyrgd í hesum samanheingi.
Flokkurin hevur sosialliberalan politikk í sínum skjaldramerki men letur sum um, hetta ikki er so. Sama má sigast um ríkisfelagsskapsstevnuna. Eisini hon er meitlað inn í floksins merki. Her yppir Sambandsflokkurin eisini øksl.
Tað er óskiljandi.
Send víðari
Hjá teimum, sum frameftir møguliga skulu gjalda fyri at liggja á Landssjúkrahúsinum, er eitt at gera.
Send rokningina víðari til Føroya dýrastu dreingir: Høgna Hoydal og Anfinn Kallsberg - og eitt eintak til Karsten Hansen.
