Eitt ógvusligt gos á italsku oynni Stromboli hevur fingið italsku myndugleikarnar at mæla skipum frá at sigla ov nær oynni. Italsku myndugleikarnir siga, at tey, sum búgva á Stromboli, eru ikki í vanda enn, men tey hava kortini fingið boð um at halda seg frá strondini, tí gosið kann elva til flóðaldu.
Loftmyndir av oynni vísa, at gosmynja rennur oman á sjógv, og tjúkkur roykur hongur uppi yvir oynni.
Nøkur fá hundrað fólk búgva á Stromboli, men oyggin er sera væl umtókt frítíðarstað um summarið.
