Javnaðarflokkurin hevur lagt uppskot fyri tingið um eykajáttan uppá 3 mió. kr. til eldraøkið.
– Vit eiga at tryggja búfólkum á røktarheimum tilboð um ítriv og fysioterapi, umframt at játta fleiri tímar til náttarvakt og matgerð. Hetta heldur Aksel V. Johannesen, formaður Javnaðarfloksins, sum nú biður tingið játta 3 mió. kr. afturat til eldraøkið í ár.
Í uppskotinum sigur Javnaðarflokkurin, at Hamragarður er ikki eindømi um røktarheim, har sparingar raka brúkarar og starvsfólk í hesum døgum.
– Vit hoyra alt ov ofta, at røktartímar og náttarvaktir verða spard burtur, at matartænastan viknar og tilboð um ítriv og fysioterapi verða skerd, so tað, sum skuldi givið lívsinnihald í gerandisdegnum, verður tikið frá fólki, sigur Aksel V. Johannesen.
Formaður Javnaðarfloksins harmast um tær fráboðanir hann javnan fær frá starvsfólkum og leiðslum um, at starvsfólkaorkan er somikið skerd seinastu tvey árini, at røktin er ikki nøktandi longur.
Aksel V. Johannesen heldur ikki, at vit eiga at góðtaka støðuna, tí umframt at hetta er tyngjandi fyri búfólkini og teirra avvarðandi, setir tað starvsfólkini í eina sera trupla støðu, tí hóast tey leggja alla orku og nærlagni í arbeiðið, so sita tey eftir við kensluni av ikki at røkka til. Eitt nú eru dømi um heim, har vaktirnar eru skerdar úr átta niður í sjey og seks tímar, og at deildir, har áður vóru fýra starvsfólk, eru nú einans trý og tvey um somu uppgávur. Eisini hoyra vit um køkar, sum verða stongdir í vikuskiftinum, so røktarstarvsfólk mugu hita mat upp og vaska upp, so dýrabara røktartíðin fer til matgerð og annað køksarbeiði.
Í viðmerkingunum til eykajáttanarumbønina verður heitt á Løgtingið um at játta 3 mió. kr. til eldraøkið. Óvist er tó, um hetta er rætta upphæddin, og tí heitir Aksel V. Johannesen á tingið um at áseta eina nøktandi upphædd í sambandi við viðgerðina av málinum
