Elias Ellefsen á Skipagøtu var stórskjútti hjá THW Kiel í dag í dysti í bundesliguni.
Á heimavølli í Wonderino høllini í Kiel vunnu Elias og liðfelagarnir greiðan 43-35 sigur á Bergischer. Í fyrra hálvleiki leikaði meira javnt á, og í steðginum var Kiel bert á odda við tveimum málum, 24-22.
Elias skoraði heili 14 mál. Hann kom til 22 málmøguleikar, og hann legði eisini upp til fýra mál (assist). Talan gjørdist sostatt um 18 málstig hjá Eliasi í dag.
Kiel er triðfremst í deildini við 18 stigum. Teir eru tvey stig aftanfyri oddaliðið, Flensburg-Handewitt.
Hákun West av Teigum var sera effektivur, tá hann og liðfelagarnir í Füchse Berlin vunnu greitt 34-26 á Leipzig á útivølli.
Hákun fekk fimm málmøguleikar, og hann setti allar í netið.
Füchse Berlin er fjórðfremst í deildini við 16 stigum.
Vilhelm Poulsen og liðfelagarnir í Hannover-Burgdorf kundu stórfegnast um ein harðvunnan 30-29 (14-14) sigur á útivølli á Lemgo.
Hannover er nummar 13 í deildini við átta stigum.
