Russiski herurin sigur nú, at tey eru farin at fyrireika eitt slag av flyting av íbúgvunum í stóra býnum, Kherson í Ukraina, sum Russland hevur havt ræðið á seinastu nógvu mánaðirnar.
- Russland vil fremst av øllum syrgja fyri einari tryggari flyting av íbúgvunum. Ukrainsk álop, vend móti undirstøðukervinum í býnum, eru ein beinleiðis hóttan fyri lívinum hjá íbúgvunum.
Tað sigur ovasti leiðarin fyri russisku herdeildunum í Ukraina, Sergej Surovikin, við ríkisriknu russisku sjónvarpsrásina, Rossiya 24, sambært Reuters.
Hann lýsir støðuna økinum sum spenta.
Leiðarin, sum Moskva hevur tilnevnt í Khersøn-økinum, Vladimir Saldo, bað fyri tveimum vikum síðan um russiska hjálp til at flyta lokala fólkið úr økinum - helst, tí hann stúrir fyri gøtubardøgum í Kherson býi.
Sama kvøld kom varaforsætisráðharri Russlands, Merat Khusnullin, og segði, at stjórnin hevur gjørt av at skipa fyri flyting av íbúgvunum í Kherson-økinum.
Ukraina hevur seinastu tiðina havt framgongd í Kherson-regiónini har suðuri í Ukraina.
Kherson, ið var ein av fýra regiónum, sum Vladimir Putin herfyri innlimaði í Russland, hevur stóran týdning fyri Russland, tí økið liggur millum Ukraina annars og Krim-hálvoynna, sum Russland tók í 2014.
##med2##
