Italia, Belgia, Danmark, Spania og Ukraina eru tey fimm londini sum vunnu seg í EM-endaspælið í fótbólti uttan at tapa ein dyst í undankappingini.
Belgia gjørdi slætt borð í undanbólki I við at vinna allar 10 undankappingardystirnar við einum samlaðum málmuni uppá 40-3,
Italia gjørdi eisini slætt borð í undanbólki J við at vinna allar 10 undankappingardystirnar við einum samlaðum málmuni uppá 37-4.
Vit vóru í undanbólki við Spania í bólki F. Har eydnaðist spaniólum at vinna átta dystir og spæla tveir javnleikir. Spania leikti 1-1 á útivølli móti Noreg í Oslo, og móti Svøríki í Solna uttanfyri Stokkhólm. Hinir átta dystirnar vann Spania. Móti Føroyum gjørdist talan um 4-0 sigur heima 4-1 sigur á Tórsvølli, har Klæmint A. Olsen skoraði eitt minniligt mál.
Í undanbólki B vann Ukraina seks dystir og spældi tveir javnar.
Í undanbólki D var Danmark ósigrað. Danskarar leiktu fýra javnleikir og vunnu fýra.
EM-endaspælið byrjar fríggjakvøldið klokkan 20 við setanardystinum millum Italia og Turkaland.