Mánakvøldið var samkoma í Fútastovu í Havn, har matstovan Roks heldur til. Roks og Ræst eru matstovur, sum tvífalda føroyska Michelin-matstovan Koks rekur heima í Havn, nú Koks er flutt til Grønlands.
Høvið var, at stóra og snotuliga bókin um Koks varð løgd fram. Talan er um stóra bók upp á útvið 300 síður, við nógvum vøkrum myndum og uppskriftum, sum Poul Andrias Ziska, høvuðskokkur á Koks hevur gjørt.
Vildu hava ein uttanveltaðan at skriva
Johannes Jensen, stjóri í Gist & Vist fegnaðist sum vera man um snotuligu bókina, og hann frøddist um kreativitetin hjá høvuðskokkinum, Poul Andrias Ziska í sambandi við bókina, sum onglendingurin Tim Ecott hevur skrivað.
Tim Ecott, sum er breti, hevur vitjað nógvar ferðir í Føroyum, síðani hann kom higar á fyrsta sinni hitti Johannes Jensen fyri tólv árum síðani.
Hann hevur fyri kortum skrivað eina bók um Føroyar, sum hann nevnir »The Land af maybe«.
– Vit vildu fegin hava onkran uttan fyri Føroyar, sum kendi Føroyar væl, at skriva bókina. Tað skuldi ikki vera ein føroyingur og ikki dani, men onkur uttan fyri kongaríkið Danmark, segði Johannes Jensen.
##med2##
Til heimsins bestu kokkar og branding
Hetta er onnur bókin um Koks, hin fyrra kom út í 2012.
Men hví eina slíka fína bók um Koks?
Til tað sigur Johannes Jensen, at tað er fyri at gera pr fyri Koks og fyri Føroyum.
Bókin er fyrst og remst til kokkar kring heimin, men eisini til journalistar, sigur Johannes Jensen.
– Ein maður í Ungarn, sum hevur spesialiserað seg í at selja slíkar bøkur til fremstu kokkar kring heimin hevur longu bílagt 100 bøkur, uttan at hann hevur sæð bókina, men tí at hann veit, hvat Koks er og stendur fyri, sigur Johannes Jensen.
Hann dylur ikki fyri, at tað sjálvandi eisini snýr seg um marknaðarføring av Koks. Men tað er eisini ein marknaðarføring av Føroyum, sigur hann.
– Ein branding er júst endamálið. Tað snýr seg um marknaðarføring av Koks, men harvið eisini um marknaðarføring av Føroyum, av ráðvørum okkara, náttúru okkara og ikki minst av Føroyum sum ferðamál, sigur hann.
– Talan er um eina branding av tí, sum vit gera samlað sæð í Føroyum, av fiskiídnaði og ferðavinnu, sigur hann.
Spurdur um tey fáa pengar burtur úr at gera eina so fína bók sigur hann, at tað fáa tey ikki, men at tað melur runt. Bókin fæst í bókhandlum í Føroyum í næstu viku. Tað eru bara 600 føroysk eintøk, restin er á enskum. Upplagið 2.600 eintøk tilsamans.
##med3##
Ein bók á enskum og ein bók á føroyskum
Talan er ikki um eina bók á tveimu málum, men um tvær bøkur á hvør sínum máli. Tim Ecott hevur skrivað bókina, sum Jonhard Mikkelsen hevur týtt til føroyskt.
Og júst tað heldur Johannes Jensen vera sera áhugavert, at tað ein bók um Føroyar, sum ein breti hevur skrivað á enskum, men sum Jonhard Mikkelsen so hevur týtt til føroyskt.
Bókin er sjálvandi eisini ætlað føroyingum, av tí at hon er bygd upp um tær 18 oyggjarnar. Tí er hon kanska áhugaverd hjá føroyingum at lesa. Men Johannes Jensen hugsar sær eisini, at bókin er væl egnað hjá virkjum og stovnum at hava sum gáva, tá tey hava útlendskar vitjanir.
– Tí so hava vit ein góða og snotuliga bók, sum umboðar føroyska gastronomi, sigur hann.
Hóast nógvar uppskriftir eru í bókini, so er hon ikki ein »kókibók«, soleiðis sum vit vanliga skilja tað, tí hon vendir sær til tey professjonellu.
– Nei, málbólkurin er kokkar ella fólk, sum nærmast hava ein øran áhuga í mati, sigur Johanens Jensen.
##med4##
Tú mást vera góður við tað tú skrivar um
Tim Ecott helt fyri, at tað undraði seg at verða spurdur um at skriva eina slíka bók um Koks, tá vit í Føroyum hava so nógva og so dugnaligar høvundar. Men tá hann fekk at vita treytir hjá Johannes Jensen og Poul Andrias Ziska um, at tað ikki skuldi vera ein føroyingur ella dani, so tók hann fegin av tilboðnum.
– Men tú kanst ikki skriva eina slíka bók um Føroyar, um tú ikki ert góður við Føroyar, og tað eri eg, segði hann.
Hann vísti á, at hann hevur skrivað alt lívið og arbeitt við útvarpi.
– Mær dámar sera væl Føroyar, og eg havi møtt so nógvum gestablídni øll árini, eg eri komin higar.
##med6##
Fylt menningini av Koks við áhuga
Og tað var fyri 12 árum síðani uppi á Hotel Føroyum, at tað rann saman millum hann og Johannes Jensen.
– Tað var ikki mín fyrsta vitjan í Føroyum, eg hevði verið her áður, tí eg hevði áhuga fyri náttúru og gongutúrum. Men vit sótu til langt út á náttina og prátaðu, og tá lærdi Johannes Jensen meg at skilja, hvussu samansett føroyska mentanin og føroyska søgan eru, og tað gjørdi meg enn meira áhugaðan í Føroyum.
– Og tað hevur verið sera áhugavert hjá mær at fylt menningini hjá Koks øll hesi árini. Tað byrjaði á Hotel Føroyum, síðani royndi eg hana í Kirkjubø, og so aftur frammi við Gjónna við Leynavatn – og so nú í Grønlandi, sigur Tim Ecott.
– Tað er framúrskarndi at síggja, hvussu nógv er komið burtur úr menningini av nýggja føroyska stílinum og at síggja, hvussu kreativur Poul Andrias Ziska er, so eg má takka honum, fyri at geva mær so nógvan íblástur. Hann hevur verið sera góður at samstarva við, og at samskifta við – eisini allar teir mongu tímarnar í telefonini, tá eg ikki hava verið her.
Hann vísti á, at tað hevur verið eitt sera gott samstarv um hesa verkætlanina, og tað heldur hann, eyðkennir Føroyar, at føroyingar duga so væl at samstara.
– Tað er eitt eyðkenni fyri tykkum, segði hann.
##med5##
Kann skapa ein modernaðan samleika
– Eg var greiður yvir, at mær fór at dáma Føroyar og føroyingar, og eg vóni, at teksturin kann fáa tað út í øll herðashorn í samfelagnum, at maturin, sum Poul Andrias ger, og at matstovurnar, sum Johannes hevur gjørt, kann skapa ein nýggjan modernaðan føroyskan samleika, sum er á sera høgum støði, og sum er trúgvur ímóti hjartanum í tí føroyska. Og tað er júst tað, sum Poul Andrias vil við síni matgerð – kann hann best sjálvur greiða frá. Men tað hevur verið ein heiður hjá mær at hava verið við í hesum arbeiði. Bókin er sera vøkur, og eg eri sera fegin um, at Johannes og Poul Andrias eru nøgdir, segði Tim Ecott.
– So vóni eg bara, at hon kann breiða orðini skjótari út kring heimin um alt tað fantastiska, sum fer fram her í hesum skapandi umhvørvinum í føroysku matstovuvinnuni, segði Tim Ecott at enda.
