Vaksandi sethúsaprísirnir seinnu árini eru ikki bert fyrimunur hjá teimum, sum skulu selja. Húsaeigarar, sum ikki nýliga hava keypt hús, hava fingið nógv størri frívirði í sínum bústøðum.
Tað skrivar Búskaparráðið í nýggju frágreiðingini, sum varð kunngjørd í morgun.
– Stóri eftirspurningurin eftir bústøðum í mun til avmarkaða útboðið hevur saman við lága rentustøðinum elvt til prísvøkstur á sethúsamarknaðinum seinastu árini. Øktir sethúsaprísir merkja hægri frívirði á bústøðum hjá teimum, ið ikki nýliga hava ognað sær eini hús.
– Tað, at fólk gerast meiri múgvandi, kann økja býlisnýtsluna, eins og vit sóu undan fíggjakreppuni í 2008, men hagtølini benda ikki á, at hetta ger seg galdandi í løtuni. Økt bjartskygni hjá føroysku húsarhaldunum kann tó føra til, at hetta møguliga broytist komandi árini, sigur Búskaparráðið.
