Tað hevur gingið sum eftir ánni hjá U-21 landsliðnum, sum í trimum teimum fyrstu dystunum í hesi undankappingini vann fulla úrtøku.
Í kvøld gekk tað heilt øðrvísi hjá Ólavi Mikkelsen og hansara monnum.
Frakland var mótstøðuliðið í Klaksvík, og fronsku stjørnurnar eru á veg til hús við 6-0 sigri eftir hálvleiksstøðuna 3-0.
Føroyar høvdu stóran møguleika at minka um munin til 2-1, tá ið Jóhan Josephsen tiltuskaði føroyska liðnum brotsspark. Tá var ein hálvur tími, og føroyski liðformaðurin Áki D. Samuelsen royndi seg úr ellivu metrum. Men franski málverjin Guillaume Restes, sum í heimligu kappingini verjir málið hjá Toulouse, bjargaði.
Vøllurin var rættiliga vátur, og tað var eitt lot, men tað sá ikki út til at órógva spælið.
Fleiri av fronsku spælarunum umboða umframt feløg í hestu heimligu kappingini eisini feløg í bestu eingilsku deildini. Eitt nú Mathys Tel, sum spælir við Tottenham. Hann umsetti sjey minuttir undan steðginum brotsspark til 3-0, og tá ið seinni hálvleikur var hálvrunnin, var støðan 6-0.
Hetta var fyrsti dysturin í hesi kappingini hjá Fraklandi. Mánadagin fær Frakland vitjan av Estlandi, og týsdagin fáa Føroyar vitjan av Sveis. Tann dysturin verður á Tórsvølli.
Føroyar – Frakland 0-6 (0-3)
0-1: Wilson Odobert 13.
0-2: Dayann Methalie 22.
0-3: Mathys Tel br 38.
0-4: Jean-Matteo Bahoya 51.
0-5: Dayann Methalie 57.
0-6: Ayyoub Bouaddi 67.
Dómari úr Finnlandi: Peiman Simani
Føroyar: Hans Jákup Arngrímsson – Hanus Højgaard (Bjarti Thorleifsson, 71.), Ejvind R. Mouritsen, Ingi Arngrímsson, Jákup N. Vilhelmsen, Virgar Jónsson (Dávid B. Andreasen, 86.) – Heini F. Sørensen (Aron Reinert Hansen, 86.), Mattias Hellisda (Jógvan K. Gullfoss, 61.) Árni Nóa Atlason, Áki D. Samuelsen – Jóhan Josephsen (Dávid Reynheim, 61.)
