Faroe Marine Products royndi fyri umleið einum ári síðani at framleiða »chips« burtur úr fiski, men hetta var gjørt við hond.
Chipsið var skorið burtur úr fiski í smalar bitar, sum líktist teimum chipsum, tú kanst keypa tú handlunum sum taffelchips.
- Hetta var ógvuliga væl móttikið, men tað loysir seg ikki at skera í hond. Tí leita vit í løtuni eftir einari maskinu, sum kann skera burtur úr fiskinum, sum síðani verður turkaður, sigur Eirikur á Húsamørk, stjóri á Faroe Marine Products.
Íslendingar framleiða eisini turran fisk í smábitum, men føroyska framleiðslan er so mikið ólík teirri íslendsku, at maskinurnar mugu verða heilt ólíkar.
- Vit eru ikki komnir fram á eina maskinu, sum kann brúkast í okkara framleiðslu. Eg veit ikki, um vit finna hana, ella um vit mugu konstruera eina maskinu sjálvir, sigur Eirikur á Húsamørk.
Hann sigur, at verður neyðuga maskinan funnin, ella megna teir at konstruera eina maskinu til endamálið, kann hetta gerast ein munagóð útflutningsvøra.
- Vit hava í løtuni nógv at gera við at framleiða turran fisk úr upsa, so tað er ilt at siga, nær vit møguliga koma í gongd aftur við fiskachipsinum. Vit vita í hvussu er, at tað er nakað, sum fólki dámar, og sum eisini kundi gjørst ein munagóð útflutningsvøra, sigur Eirikur á Húsamørk, stjóri á Faroe Marine Products.
