Hagstova.fo:
Kamarsnæturnar eru øktar við góðum 6.000 náttum, 12 prosentum, og fólkanæturnar eru nærum 11.300 fleiri í mai, juni og juli í ár enn í fjør.
Í mai, juni og juli mánaði í ár hava føroysku gistingarhúsini tilsamans havt 95.854 fólkanætur. Tað eru 11.299 fleiri enn sama tíðarskeið í fjør, ið er ein øking á 13,4 prosent.
Innskrivingarnar eru somuleiðis fleiri í ár, samanborið við mai, juni og juli í fjør. Talan er um 4.910 fleiri innskrivingar samanlagt, ein øking á 16,2 prosent.
Innskrivingarnar vóru samanlagt 35.240 í tali fyri mánaðirnar mai, juni og juli í ár. Sostatt hava 4.910 fleiri fólk skrivað seg inn á eitt føroyskt gistingarhús í hesum tíðarskeiði í ár, tá samanborið verður við sama tíðarskeið í fjør.
Fólk, ið eru búsitandi í Føroyum, eiga 3/5 partar av økingini í innskrivingunum hetta tíðarskeiðið í ár. Talan er um 3.224 innskrivingar fleiri hjá fólki við bústaði í Føroyum, og samanlagt hava 8.564 fólk við føroyskum bústaði skrivað seg inn á eitt gistingarhús í mai, juni ella juli í ár. Hóast færri fólk við donskum bústaði hava vitjað føroysku gistingarhúsini, er talan tilsamans um 8.125 innskrivingar fyri hendan bólkin fyri somu tríggjar mánaðirnar. Ímeðan hava upp ímóti 1.900 fleiri fólk, við bústaði uttan fyri Føroyar og Danmark, skrivað seg inn á eitt føroyskt gistingarhús í mai, juni og juli í ár, tá samanborið verður við undanfarna ár.
Fólkanæturnar vóru samanlagt 95.854 í tali fyri mai, juni og juli í ár. Samanborið við sama tíðarskeið í fjør, tá talið var 84.555, er talan um eina øking á 13 prosent.
Í prosentum er størsta broytingin uttan fyri Tórshavnarøkið; við 13.136 fólkanætum er talan um eina øking á 42 prosent í mun til undanfarna ár. Í Tórshavnarøkinum vóru 82.718 fólkanætur tilsamans, ið er ein øking á 10 prosent samanborið við sama tíðarskeið í fjør.
Í ár vóru 55.528 av 72.006 tøkum kamarsnáttum á gistingarhúsunum brúktar í mai, juni og juli. Hetta svarar til eitt samanlagt nýtslustig á 77% í miðal fyri hesar tríggjar mánaðirnar. Tá samanborið verður við sama tíðarskeið í fjør, var miðal nýtslustigið 69%.
Orðalýsingar
Fólkanætur telja, hvussu nógv og hvussu leingi fólk gista. Um 3 fólk gista 2 nætur, eru hetta 6 fólkanætur.
Innskrivingar telja, hvussu nógv fólk verða innskrivaði. Um 3 fólk skriva seg inn, eru hetta 3 innskrivingar, óansæð hvussu leingi tey gista.
Kamarsnætur telja, hvussu nógv og hvussu leingi kømur verða brúkt. Um 2 kømur verða brúkt í 2 nætur, er talan um 4 kamarsnætur. Talið á fólki, ið gista, er ikki viðkomandi í hesum sambandi.
Nýtslustigið vísir í prosentum, hvussu stórur partur av tøku kømrunum verður brúktur.
Tórshavnarøkið fevnir um Tórshavn, Argir og Hoyvík.
Uppgerðin fevnir ikki um gistingarhúsini í Suðuroy.
Fleiri talvur o. a. á hagstova.fo
