SAMRÁÐINGAR
Alt bendir á, at rættiliga trupult er at vinna undir land við samráðingunum um nýggjan sáttmála millum reiðarar og fiskimenn.
Nøkur viðurskifti eru fingin upp á pláss, men hvørja ferð oljan kemur upp at venda, dregur sundur millum partarnar, sum framvegis standa langt frá hvørjum øðrum í spurninginum um luttøku.
Reiðarafelagið hevur eftir øllum at døma sett sær fyri, at nú skal oljan takast við og vísir til eitt protokollát um luttøku í oljuútreiðslum, sum áður er skrivað millum partarnar.
Talan er um tilsamans átta skipabólkar, ið samráðst verður um, og av hesum luttaka manningarnar í tveimum teirra í oljuútreiðslunum. Hetta er í bólkunum fyri línuskipini og flakatrolararnar.
Formaðurin í Føroya Reiðarafelag, Viberg Sørensen, hevur sagt, at kemur spurningurin um oljuna ikki upp á pláss, verður neyvan nakar sáttmáli.
Áðurnevnda protokollát bygdi á, at fór oljan upp um 2,90 krónur fyri liturin, skuldi – sum Viberg Sørensen tekur til – slóðast fyri, at manningin kundi verða við til at gjalda fyri oljuna.
- Nú bunkringarprísurin táttar í 4 krónur fyri liturin, vilja vit, at hesin spurningur verður loystur í samráðingunum, sigur Viberg Sørensen.
Tað eru eisini onnur viðurskifti, sum reiðarafelagið og manningarfeløgini dragast við undir hesum samráðingum, og í løtuni eru smá útlit til nakra semju millum partarnar, nú so stór ósemja er um luttøku í oljuútreiðslunum.
