Grønland sendir eitt greitt signal til USA í dag undan einum týðandi fundi í morgin í Hvítu Húsunum, upplýsir seniorgranskarin Ulrik Pram Gad.
Um Grønland skuldi velja ímillum USA og Danmark, so valdi stjórnarleiðarin og formaðurin í landsstýrinum Jens-Frederik Nielsen Danmark her og nú.
Tað kundi ikki verið sagt greiðari, sambært seniorgranskarinum frá danska altjóða stovninum, Diis.
– Tað er fyrst og fremst eitt signal til USA, at vit fara inn í tað rúmið saman og vænta at koma saman út aftur, sigur Ulrik Pram Gad um donsku og grønlendsku sendinevndina, sum skal hitta USA í morgin.
Í so máta heldur hann, at útsagnirnar frá USA um at vilja yvirtaka Grønland, hóast tey eru sameind, hava verið mótvirkandi. Tí Danmark og Grønland hava skakað seg meira saman hóast ávísar politiskar og søguligar ósemjur.
Á tíðindafundi í dag í forsætismálaráðnum segði Jens-Frederik Nielsen tað greiðari enn hann hevur áður.
– Vit eru í geopolitiskari kreppu. Um vit skulu velja ímillum USA og Danmark her og nú, so velja vit Danmark. Vit velja NATO, danska kongaríkið og ES, segði hann.
Jens-Frederik Nielsen kallaði stuðulin úr Evropa og Danmark "heilt avgerandi".
Seniorgranskarin Ulrik Pram Gad heldur, at hetta er sera nágreiniliga orðað.
– Teirra langtíðarætlan er framvegis at gerast sjálvstøðug, og tey fata tað, sum USA ger, sum eina hóttan, sigur hann.
Lars Løkke Rasmussen, danskur uttanríkisráðharri, og Vivian Motzfeldt, grønlendsk uttanríkisráðfrú, eru á ferð til USA.
Her eru tey á fundi við amerikanska varaforsetan J.D. Vance og amerikanska uttanríkisráðharran Marco Rubio í Hvítu Húsunum í Washington D.C.
Sambært upplýsingum frá DR og TV2 verður fundurin kl.15.30 okkara tíð. Tað kann tó verða útsett.
/Ritzau/
