Hernaðarligi palestinski bólkurin Hamas upplýsir í morgun, at tess hermenn framvegis eru inni í Ísrael, har hermenninir eru í »ógvusligum bardøgum«.
Tað skrivar tíðindastovan Reuters, sum vísir til eini boð frá Hamas.
Eisini ísraelski herurin sigur í morgun sambært BBC frá bardøgum millum ísraelska herin og Hamas í Ísrael.
Bardagar eru í átta økjum í syðra parti av landinum.
Sambært norsku tíðindastovuni NTB upplýsir Hamas, at bardagar eru í ísraelsku býunum Ofkim, Sderot, Yad Mordechai, Kfar Azza, Beéri, Tatid og Kissufim.
Upplýsingarnar um ítøkiligu støðini eru tó ikki váttaðir av Ísrael.
Hamas leyp á Ísrael í gjáramorgunin, tá rørslan sambært Hamas sjálvum sendi 5.000 rakettir móti Ísrael í stutta tíð. Ísraelski herurin segði, at tað vóru einar 2.000 rakettir. Eitt ógvusligt tal kortini.
Í morgun er tað sambært ísraelska miðlinum Times og Israel skrásett upp ímóti 300, sum eru deyð í Ísrael.
Næstan 1.600 eru særd. Millum tey eru bæði sivil, hermenn og løgreglufólk.
Ísraelski herurin hevur almannakunngjørt ein lista yvir fyribils 26 deyð ísraelsk herfólk. Listin sæst millum annað í Times of Israel.
Á listanum eru bæði kvinnur og menn í aldrinum 18 til 42 ár. Tey flestu av teimum deyðu eru ung í 20'unum.
Samstundis upplýsir ísraelska løgreglan í morgun, at 30 løgreglufólk eru deyð í bardøgum við Hamas, skrivar ísraelski miðilin Haaretz.
Sambært palestinska heilsumálaráðnum eru 256 palestinar deyðir í loftálopum móti Gaza seinastu 24 tímarnar.
Harumframt eru skrásett 1788 særir palestinar í morgun.
Ísrael hevur vanliga strangt eftirlit á markinum millum Ísrael og Gaza, men í sambandi við álopið hjá Hamas í gjár brutu hermenn frá Hamas sær veg gjøgnum marknasstikið og streymaðu inn í Ísrael.
/ritzau/
