– Jógvan Skorheim 40 ár - Øll vælkomin til grillað lamb.
Soleiðis skrivar klaksvíksblaðið Norðlýsið.
Føðingardagsbarnið Jógvan Skorheim hevur, hóast lutvíst unga aldurin, sitið sum borgarstjóri í Klaksvík í átta ár og fyri ta tíð fýra ár sum varaborgarstjóri. Hann hevur harumframt verið løgtingsmaður og formaður í Sjálvstýri.
Í Norðlýsinum stendur, at í sambandi við føðingardagin verður bjóðað til grillað lamb uttan fyri Norðlýsið og Samráð á Klaksvíksvegi 28 í morgin frá kl. 12.00.
– Eg havi hugt eftir veðrinum, og tað sær út til at gerast turt og hampiliga gott um middagleitið í morgin. Eg havi eisini tosað við grillmeistarin Árna Müller, sum er til dystin fús at grilla lamb við tilhoyri, sigur Jógvan Skorheim við Norðlýsi.
– Hetta er kanska eitt fínt høvi hjá teimum sum hava ein matarsteðg frá arbeiðsplássinum at støkka framvið til ein betri bita.
Øll eru hjartaliga vælkomin sigur Jógvan Skorheim.