So er tað staðfest. Heini Vatnsdal verður partur av KÍ liðnum restina av hesum árinum og tvey tey næstu kappingarárini. Sáttmálin er galdandi fram til ársenda 2022.
KÍ skrivar soleiðis á heimasíðu síni:
Í dag kunnu vit avdúka, at Heini Vatnsdal framyvir fer at leika fyri KÍ. Heini kann røkja pláss bæði á miðjuni og í verjuni.
Heini er suðuroyingur, men valdi í 2013 at skifta til HB í Tórshavn. Stutt eftir fekk Heini debut á A-landsliðinum, tá Føroyar leiktu ímóti Írlandi á útivølli tann 7. Juni 2013.
Í 2015 valdi Heini at fara niður til Keypmannahavn í lestrarørindum, har hann skrivaði undir við Fremad Amager. Fremad Amager spælir í næstbestu deildini í Danmark.
Heini hevur seinastu tíðina havt eitt ynski um at flyta heim til Føroyar, og hevur nú undirskriva sáttmála við KÍ.
Heini Vatnsdal er skrásettur fyri 99 dystir í Betri Deildini og 19 A-landsdystir sambært Faroesoccer.
Sáttmálin ímillum Heina og KÍ er galdandi fram til desember 2022.
Síðsti dysturin hjá Heina Vatnsdal í Fremad Amager var í dag ímóti Vejle BK. Fremad Amager vann 4-1 og endaði á fjórða plássi í næstbestu donsku deildini.
KÍ fer mánakvøldið at spæla á útivølli ímóti NSÍ.
