Arbeiðið við nýggju útstykkingini hjá Sands kommunu á Skarðsbøi gongur eftir ætlan.
- Teir eru nú komnir so mikið langt við sjálvari útstykkingini, at liðugt er at spreingja.
Tað siga tey í Sands kommunu, har entreprenørfyritøkan, J&K Petersen, er í holt við nýggja útstykking.
Sagt verður, at tveir triðingar av grundstykkjunum eru liðugt planerað, og arbeiðið at leggja leiðingar byrjar í næstu viku.
Nakað av gróti skal koyrast av økinum aftrat.
- Arbeiðið verður sum ætlað liðugt um mánaðarskiftið november/ desember í ár, siga tey í Sands kommunu.
Leiðsla og arbeiðsfólk hjá J&K Petersen eru sera fegin um vælvild og tolsemi, sum sandingar hava víst.
- Serliga veita tey grannalagnum, sum stundum hevur verið órógvað av arbeiðnum, eina tøkk.
Í Sands kommunu siga tey, at nærmastu grannar fleiri ferðir hava borið arbeiðsfólkinum bæði pannukøkur, bollar og heimabakaðar vaflur.
- Eydnan er at finna, har grannar semjast væl, leggur kommunan aftrat.
