Í nátt føroyska tíð vóru seinastu dystirnir leiktir í innleiðandi bólki A í HM-endaspælinum fyri felagslið.
Inter Miami og brasilska, Palmeiras leiktu javnt 2-2 frammanfyri einum næstan fullsettum Hard Rock leikvølli í Miami. Og tað eigur at vera ein lætti hjá FIFA. Inter Miami var á sigurskós við einari 2-0 leiðslu, men seinastu løtuna skoraði Palmeiras tvær ferðir. Tadeo Allende í sekstanda minutti og Luis Suarez í 65. minutti skutu málini hjá Inter Miami. Paulinho og Mauricio skoraðu málini hjá Palmeiras.
Inter Miami og Palmeiras endaðu bæði á fimm stigum, og tey vinna seg bæði víðari til áttandapartsfinalurnar.
Í einum málríkum og undirhaldandi dysti leiktu FC Porto og Al Ahly javnleik 4-4. Í steðginum var Al Ahly á odda 2-1. Málskjúttar hjá Porto vóru: Rodrigo Mora í 23. minutti, William Gomes í 50., Samu Aghehowa í 53., og Pepe í 89. minutti. Málskjúttar hjá Al Ahly vóru Wessam Abou Ali í 15. minutti og í 45. minutti, og við brotssparki í 51. minutti. Mohamed Ali Ben Romdhane skoraði í 64. minutti.
Áskoðaratalið til minnliga 4-4 javnleikin var 39.900 á MetLife leikvøllinum í East Rutherford í New Jersey. Áskoðaraapasiteturin er annars 82.600.
Porto og Al Ahly endaðu bæði á tveimum stigum, og eru bæði úti av kappingini.
Inter Miami møtir PSG, og Palmeiras møtir Botafogo í áttandapartsfinalunum, ið vera leiktar komandi leygardag.
HER ber til at síggja hæddarpunktini frá 2-2 javnleikinum millum Inter Miami og Palmeiras:
##med2##
HER ber til at síggja hæddarpunktini frá 4-4 javnleikinum millum Porto og Al Ahly:
##med3##
