ÍF tekur avbjóðingina aftur at spæla í bestu deildini í stórum álvara.
Í gjár varð kunngjørt, at felagið hevur skrivað undir sáttmála við nýggjan málverja.
Talan er um Petur Meinhard Magnussen, sum hevur vart B68 málið. Nú skal hann kappast við Tóra Traðará um plássið millum ÍF stólparnar.
Í kvøld boðar ÍF frá, at felagið hevur skrivað undir sáttmála við málmansvenjara. Talan er um Jákup Mikkelsen, sum er gamal kenningur í Fuglafirði. Fyrrverandi landsliðsmálverjin hevur áður vart ÍF málið og verið bæði hjálparvenjari og venjari hjá ÍF.
ÍF heimasíðan skrivar soleiðis:
Ólavur Larsen heldur fram sum hjálparvenjari og Jákup Mikkelsen legst aftrat sum málmans- og hjálparvenjari. Ikki kann sigast annað, enn at tað eru tveir sera týðandi persónar fyri ÍF, sum í dag leggjast aftrat venjaratoyminum.
Hóast sín unga aldur á 35 ár, hevur Ólavur verið felagnum ein dyggur stuðul í nógv harrans ár, bæði sum leikari, formaður og venjari. Í næstum fer Ólavur undir A-venjara útbúgvingina hjá FSF, sum er eitt krav fyri at verða venjari í bestu føroysku deildini. Spennandi verður at fylgja venjaraleiðini hjá Ólavi í framtíðini.
Jákup er eisini ein sera væl kendur maður í Fuglafirði. Tá snakkað verður um leikarar við legendustatus, so kann ikki hyggjast burtur frá Jákupi. Jákup spældi við ÍF frá 2010 til 2014, og var tí við til at vinna øll tey fýra silvurheiðursmerkini vit fingu hesi árini. Jákup var eisini uttan iva ein av størstu grundunum til, at tað gekk so væl hesi árini. Longu í 2015 var Jákup aftur í felagnum, hesaferð tók hann yvir sum venjari teir síðstu fýra dystirnar av kappingarárinum. Tað mesta av 2016 og 2017 var Jákup høvuðsvenjari hjá okkum.
Venjaratoymið er nú uppá pláss við Hegga Samuelsen (høvuðsvenjari), Ólavur Larsen (hjálparvenjari), Jákup Mikkelsen (hjálpar- og málmansvenjari) og Hanus Eliasen (fysiskur venjari).
Vit í ÍF eru sera væl nøgd við hesa samansetingina, og ynskja teimum alt tað besta.
Í fjør var Jákup Mikkelsen hjálparvenjari í barndómsfelagnum KÍ.
